اسلام آباد۔ 22اکتوبر (اے پی پی) بنجائی وزیر اطلاعات و نشریات چوہدری فواد حسین مقبوضہ کشمیر اٹی بھارتی بیدادی نا ترندی اٹ مذمت ءِ کرسا پارینے کہ دیرینہ کشمیر نا ویل انا ایسری آن بیدس سویلی ایشیا ٹی پائیدار امن نا تغ پورو مننگ کپک، مقبوضہ کشمیر اٹی کودک شاری تا وہوک آ دتر اقوام متحدہ نا ضمیر آ داغ اسے، مقبوضہ کشمیر اٹی بھارتی کوزہ گر فوج انا توفک و ظلم انا نشانہ جہانی ضمیر جوڑ مننگ ءِ، کشمیری تینا حق خودارادیت نا جہانی وعدہ پورو مفننگ نا سوب بھارتی درندگی نا نشانہ جوڑ مننگ ءُ، ودوک آ ظلم بھارت نا مقبوضہ وادی ٹی شکست نا اعتراف ءِ۔ دوشنبے نادے تینا بیان اٹی بنجائی وزیر اطلاعات و نشریات چوہدری فواد حسین پارے کہ مقبوضہ کشمیر نا لمہ ، ایڑ ، چنا ، ورنا و بزرگ آک حریت نا مثال اس قائم کرینو۔ اوپارے کہ جہانی برادری اقوام متحدہ نا کشمیری تتون کروک آ تینا وعدہ غاتے پورو کننگ اٹ کڑد ادا کے۔ اوپارے کہ کشمیری تا حق خودارادیت نا دوئی اسکان اوفتا اخلاقی ، سیاسی و سفارتی مخ تفی ءِ برجاتخنہ۔ اوپارے کہ کشمیر اٹی شہید مروک آ حریت پسند اصول و سچائی نا چمکوک آ استارآک ءُ۔
