اسلام آباد۔ 19اکتوبر (اے پی پی) وزیراعظم عمران خان سعودی فرمانرواشاہ سلمان بن عبدالعزیز نا سلہ غا 2دے ئی ’’آخبتی زرکاری گام گیج‘‘ کانفرنس اٹی بشخ ہلنگ کن 23اکتوبر آ ریاض انا دورہ ءِ کیک۔ کانفرنس اٹی کاروباری شخصیت آک، زرکار، کارپوریٹ نا بشخ انا پنی آ راہشونک، ہائی ٹیک انڈسٹری و ذرائع ابلاغ نا اہم ادارہ غاتا نمائندہ غاک شرکت کیرہ۔ جمعہ نادے ترجمان دفترخارجہ تینا بیان اٹی پارے کہ کانفرنس ہرادے’’صحرا میں ڈیووس‘‘ گوندنگانے نا اولیکو دے وزیراعظم عمران خان نا بشخ ہلنگ نا مسخت پاکستان نا اقتصادی و زرکاری لائخی تون اوار اوار بروک آ پنچ سال اٹی ملک انا بابت تینا وژن ءِ تالان کروئی ءِ۔ وزیراعظم داوخت آ شاہ سلمان و ولی عہد محمد بن سلمان تون ہم اوڑدہی کیک ہراٹی تین پہ تینی است خواہی نا معاملہ غاتیا خیال آتا درشانیءِ کیک۔ بیان اٹی پاننگانے کہ دا کانفرنس پاکستان اٹی زرکاری نا است خوااہم کاروباری راہشون آتون اوڑدہی نا ہم موقع فراوان کیک۔ ’’آخبتی زرکاری گام گیج‘‘ سعودی عرب اٹی داسہ سالانہ دود انا دروشم اختیار کرینے۔ اولیکو کانفرنس گدرینگوک آ سال اڈ ہلکوسس ہراٹی 90 ملک آتا 3800 بندغ آک بشخ ہلکوسر۔ داسال کانفرنس اٹی بھلو کچ اسے ٹی پنی آ شخصیت آتا بشخ ہلنگ نا گمانی ءِ۔ بیان اٹی پاننگانے کہ وزیراعظم عمران خان نا کانفرنس اٹی بشخ ہلنگ سعودی سلطنت نا کنڈآن جہانی کاروباری و زرکاری نا مون آ بروک آ محور جوڑ مننگ نا کوشست آتون ننا یکجہتی نا غماز ءِ۔
