اسلام آباد۔ 18 اکتوبر (اے پی پی) وزیراعظم عمران خان پنچ شنبے نادے ملائیشیا نا وزیراعظم مہاتیر محمد تون ٹیلی فون آ رابطہ کرے ۔ اوپاکستان نا الس و تینا کنڈآن مہاتیر کن قدرومنزلت نا جوزہ غاتا درشانی ءِ کرسا پارے کہ او اسہ مدبر و جہانی راہشون اسے۔ وزیراعظم آفس آن جاری بیان نا رداٹ وزیراعظم عمران خان ملائیشیا نا وزیراعظم ءِ لس گچین کاری تیٹی ’’پاکاتن ہراپن‘‘ نا سرسہبی آ مبارکبادی تس۔ اوملائیشیا نا سوگو اقتصادی شونداری کن وزیراعظم مہاتیر محمد نا وژن نا ستاءِ کرے وخت اس کہ وزیراعظم مہاتیر محمد ہم وزیراعظم عمران خان کن ہنداہی جوزہ غاتا درشانی ءِ کرسا پاکستان ناساڑی آ گچین کاری تیٹی پاکستان تحریک انصاف نا سرسہبی آ مبارکبادی تس۔ وزیراعظم عمران خان ہڑتوم آ ملک آتا نیام اٹ بڑزکو کہول انا ہن و بر و اسہ ایلو نا مہارت آن فائدہ ہرفنگ کن عملی کہول آ اواری اٹ کاریم نا گرج آ زور شاغا۔ وزیراعظم ملائیشیا نا ہم منصب ءِ پاکستان نا دورہ نا سلہ خلک ہرادے او امنا کرے۔ وزیراعظم مہاتیر محمد ہم وزیراعظم عمران خان ءِ ملائیشیا نا زوت دورہ ءِ کننگ نا سلہ خلک و اوہم داسلہ ءِ امنا کرے۔
