اسلام آباد۔ 18 اکتوبر (اے پی پی) چین نا دورہ ءِ کروک آ سینئر پاکستانی صحافی تا ڈل پنچ شنبے نادے بیجنگ آن شنگھائی رادہ مس۔ ڈل اٹی پاکستان نا سینئر صحافیک اوار ءُ۔ پاکستان نا صحافی چین نا اسہ پٹی اسہ شاہراہ نا رداٹ جاری چندی ڈٹ آتا جاچ ءِ ہلیر۔ ڈل اٹی سہیل وڑائچ، ہارون رشید، ارشاد عارف، حبیب اکرم ، سلیم بخاری، نذیر لغاری، خوشنود علی خان، مجاہد بریلوی ، شعیب بن عزیز، عامر خان، ظفر الدین و منصور عباس اوار ءُ۔ پاکستانی صحافی چین نا پنچ دے ئی دورہ ءِ کننگ ءُ و دادورہ نا مسخت ہڑتوم آ ملک آتا نیام اٹ میڈیا نا بشخ اٹی کمکاری ءِ مون آ دننگ ناءِ۔ بیجنگ اٹی بی بی سی تون ہیت وگپ کرسا پنجاب فلم سنسر بورڈ انا چیئرمین شعیب بن عزیز پارے کہ دا دورہ ’’انڈر سٹینڈنگ چائنہ‘‘ نا تصور نا رداٹ مننگ ءِ و دانا مسخت ہڑتوم آ ملک آتا نیام اٹ چندی بشخ آتیٹی کمکاری ءِ مون آ دننگ ناءِ۔ بیجنگ اٹی اڈ کننگ اٹی پاکستانی ڈل چینی حکومت نا بڑزکو عہدیدار ، کمیونسٹ پارٹی نا باسک و چینی میڈیا نا نمائندہ غاتون اوڑدہی کریر۔پاکستانی صحافیک چین نا وزارت خارجہ نا ہم دورہ ءِ کریر و جہانی پریس سینٹر اٹی معمول نا بریفنگ نا تینٹ مشاہدہ ءِ کریر۔ اوپاریر کہ ڈل چین نا ہوانیگ گروپ نا ہم دورہ ءِ کرے ہراڑے اوفتے ساہیوال اٹی پاکستان نا اولیکو سپر فیشل کول پاور پلانٹ نا بارواٹی احوال تننگا۔ ڈل چائنہ اکنامک نیٹ انا چیئرمین تون ہم اوڑدہی کرے و اوفتیان پاکستان و چین نا میڈیا نا نیام اٹ کمکاری نا بابت معاملہ غاتیا ہیت وگپ کریر۔ پاکستانی ڈل (اینو) جمعہ نادے پدی بریک۔
