کوئٹہ ۔ 18 اکتوبر (اے پی پی) صوبہ نا ایلو ضلع غاتیامبار ضلع مستونگ اٹی ہم انسداد سورک مہم 15 اکتوبر آن بناکرینے ہرا 27 اکتوبر اسکان برجاسلک۔ دامہم اٹی ضلع مستونگ نا مسہ تحصیل اٹی 24یونین کونسل آتیان بیدس اسہ موبائل ٹیم و اسہ ریزروٹیم نا رداٹ 110 ٹیم بشخ ہلنگ ءُ ہرا مچ آ ضلع نا نہہ تُو آن پنچ سال نا 50646چناتے سورک آن بچفنگ نا ٹیکہ خلنگک دا ٹیمک مر مر انگا علاقہ غاتے ٹی کم از کم 77 آن 162چناتے ٹیکہ خلنگ نا بست و بند کننگانے۔ ڈپٹی کمشنر مستونگ قائم لاشاری باقاعدہ انسداد سورک مہم نا بناءِ ڈسٹرکٹ ہیڈ کوارٹر ہسپتال مستونگ اٹی کرے۔ داوخت آ ایم ایس گودی ساجدہ پروین مینگل محکمہ جان جوڑی نا ڈاکٹر یحییٰ ہاشمی، ڈاکٹر مجید سمالانی ، حاجی عزیز احمد و ایلوکمامدارآک ساڑی ئسر۔ ڈپٹی کمشنر پارے کہ سورک مہم ءِ سرسہب کننگ بیرہ محکمہ جان جوڑی نا زمواری اف بلکن دا قومی ءُ مہم اسے و ننا غٹ انا فرض ءِ کہ اواری اٹ دامہم ءِ سرسہب کین تانکہ تینا آخبت نا معمار تے ہلوک آ ناجوڑی آن بچفنگ کین ۔ ڈپٹی کمشنر پارے کہ مچ آ ضلع ٹی بشخ ہلوک آ ٹیم تا کارکڑد ءِ چیک کننگ کن ہردے ایوننگ میٹنگ اٹی رپورٹ تروئی مریک تانکہ ضلع نا مر مر انگا علاقہ غاتے ٹی اسہ چناس ہم داٹیکہ غاتیان محروم مف۔
