اسلام آباد۔18اکتوبر(اے پی پی) مزن وزیر عمران خان ءَ پنچ شمبے ءِ روچءَ ملائیشیا ءِ مزن وزیر مہاتیر محمد ءَ گوں ٹیلی فون ءَ گپ ءُ تران کتگ۔ آئیءَ پاکستان ءِ اُلس ءُ وتی نیمگءَ پہ مہاتیر محمد ءَ دادءُ ارزشتءِ جوشءُ جزبگ ءِ درشانی کتگءُ گشتگ کہ آ یک زانت کارءُ میاں او ستمانی رہشون اِت۔ مزن وزیر کارگس ءَ چہ جاری بوتگیں بیان ءِ ردءَ مزن وزیر عمران خان ءَ ملائیشیا ءِ مزن وزیر ءَ را لھس گچین کاری ءَ ’’پاکاتن ہراپن‘‘ ءِ سوبمندی ءَ مراد بات داتگ۔ آئی ءَ ملائیشیا ءِ مھکمیں اقتصادی دیمروئی ءَ مزن وزیر مہاتیر محمد ءِ وژن ءَ را ساڑاتگ وہدے کہ مزن وزیر مہاتیر محمد ءَ ہم مزن وزیر عمران خان ءِ ھاترءَ نیکیں واہگ ءِ درشانی کتگءُ پاکستان ءِ انوگیں گچین کاری ءَ پاکستان تحریک انصاف ءِ سوبمندی ءَ مراد بات داتگ۔ مزن وزیر عمران خان ءَ ملائیشیا ءِ مزن وزیر ءَ را پاکستانءِ ترءُ تا ب کنگءِ دعوت داتگ کہ آئیءَ قبول کتگ۔ مزن وزیر مہاتیر محمد ءَ ہم مزن وزیر عمران خان ءَ را ملائیشیا ءِ زوت ترءُ تاب کنگءِ دعوت داتگ کہ آئیءَ قبول کتگ۔
