اسلام آباد۔ 17 اکتوبر (اے پی پی) بنجائی وزیر اطلاعات و نشریات چوہدری فواد حسین پارینے کہ اسپیکر قومی اسمبلی اسد قیصر ریمانڈ اٹی اسہ دوبہ دار اسے ایوان اٹی بٹنگسا مثال اس قائم کرینے، پنجاب اسمبلی ٹی اپوزیشن باسک آتا رویہ مذمت نا قابل ءِ، ہراوڑ دھاندلی نا برخلاف کمیشن اس جوڑ کننگا ہمووڑ ملک انا ساڑی آ حالیت آتا زموار آتا تعین کن کمیشن اس جوڑ کننگے۔ وزیراعظم سہی پاریسس کہ 50 خلقت بایدے جیل اٹی مروسر ، ہمو بندغ آک شور کننگ ءُ ولے احتساب نا عمل سلپک۔ ہرافک پاکستان نا پیسہ غاتے دُزار اوفتا احتساب ضرور مریک۔ دوشنبے نادے پارلیمنٹ ہاؤس نا پیشن میڈیا تون ہیت وگپ کرسا بنجائی وزیر پارے کہ احتساب نا عمل آن بچنگ کن اسمبلی نا دیوان ءِ بٹنگ انگا ولے اسپیکر نا کنڈآن ریمانڈ اٹی اسہ ڈوہدار اسے دیوان اٹی بٹنگسا مثال اس جوڑ کننگانے ۔ مستین اٹی پروڈکشن آرڈر جاری کرسا جیل آن خلقت ءِ اتنگا ولے ریمانڈاٹی ہچ گہس ءِ ایوان اٹی اتنگتنے۔ بنجائی وزیر پارے کہ اپوزیشن لیڈر ءِ ریمانڈاٹی ایوان اٹی بٹنگ انگ نا حکومت مخالفت ءِ کتو۔ احتساب نا عمل ننا بناکروک اُس اف۔ مسلم لیگ (ن) و پیپلزپارٹی تینا پسند نا خلقت احتساب کن خلکوسر۔ بنجائی وزیر پارے کہ گچین کاری تیٹی پی ٹی آئی کٹے تو دھاندلی و مسلم لیگ (ن) کٹے تو او دھاندلی زدہ مفسہ۔ مرضی نا برخلاف نتیجہ غاک بریر تو جمہوریت ءِ خطرہ مریک۔ بنجائی وزیر پارے کہ درو پنجاب اسمبلی ٹی ہراوڑ نا رویہ ءِ اپوزیشن اختیار کرے او مذمت نا قابل ءِ۔ دا ہندا چرجوئی نا کڑی ءِ۔ اسپیکر پنجاب اسمبلی مسلم لیگ (ن) نا شش اسمبلی نا باسک آتے ایوان آن پیشن کننگ نا آرڈر کرے۔ بنجائی وزیر پارے کہ نن اسمبلی ٹی احتساب کن شرہ غا تیار اُن ہراوڑ گچین کاری تیٹی دھاندلی نا بابت پارلیمانی کمیٹی اس جوڑ کننگا ہنداوڑ داوخت آ ملک انا ساڑی آ حالیت آتا زموار آتا تعین کن پارلیمانی کمیشن اس جوڑ کننگے و داڑآ بایدے شرہ مرے۔ تینا ادارہ غاتا برخلاف ہنگامہ آرائی سہی اف۔ چوہدری فواد حسین پارے کہ تدوک آدے آصف زرداری کراچی نا عدالت اٹی پیش مس۔ شہباز شریف لاہور عدالت اٹی پیش مس وخت اس کہ نواز شریف اسلام آباد نا عدالت اٹی پیش مس۔ گدرینگوک آ دہ سال اٹی پاکستان نا ہرا حال ءِ کننگانے اونا زموار آتا تعین المی ءِ۔ پاکستان نا قومی ادارہ نسخان بشمول پی آئی اے ، ریڈیو، پی ٹی وی، ریلوے نسخان اٹی چلینگ انگ ءُ۔ سوئی گیس اٹی 2013ء ٹی اسہ پیسہ سے نا ہم نسخان ہلوکہ وخت اس کہ پنچ سال اٹی نسخان 157 ارب اسکان سرمسنے ہراتم دا بابت ہیت کین تو پارہ جمہوریت خطرہ ٹی ءِ۔ بنجائی وزیر پارے کہ احتساب آن جمہوریت ءِ آخا موٹو گینگ ءِ خطرہ ءِ۔ اخس کہ مرضی ءِ شور کیر احتساب نا عمل سلپک۔ اسہ سوج اسے نا ورندی ٹی بنجائی وزیر پارے کہ حکومت سوگو ءِ۔ سازش کروک آتے جاگہ ملنگ اف و نئے ملک۔
