اسلام آباد۔ 17اکتوبر (اے پی پی) بنجائی وزیر پٹرولیم و قدرتی وسیلہ غلام سرور خان پارینے کہ پاکستان نا پٹرولیم مصنوعات و گیس انا درآمدی بل بھاز ودانے ، گردشی کڑزآک 1200 ارب روپئی آن زیات ءُ ، گیس کمپنیک 150 ارب روپئی نا نسخان اٹی ءُ ، گدرینگوک آ 5سال اٹی ہچ ءُ پوسکن ءُ کوڑی اس خننگ انگ تنے ، یخ انا موسم اٹی گیس انا کاختی مریک، توانائی نا تنکی نا مون ءِ توننگ کن گونڈ، نیامی و مریس وختی گام گیج کننگک۔ چارشنبے نادے داڑے انرجی فورم 2018 ء نا بنائی سیشن آن تران کرسا اوپارے کہ ننے مون نا سمت انا تعین ءِ کروئی ءِ، 60 انا دہائی ٹی بھارت تون سندھ طاس معاہدہ کننگانے، مسہ ڈیم بھارت و مسہ ننا بشخ اٹی بسر۔ تربیلا و منگلا ڈیم کون آ بھلا ڈٹ آک ہندا عشرہ ٹی پورو مسر ولے اوکان پد ہچ ءُ پوسکن ءُ ڈیم اس جوڑ مننگ کتو۔ کالا باغ ڈیم ءِ ہم سیاسی رنگ تننگا و اوڑآ سیاست ہاوی مس۔ اوپارے کہ توانائی نا تنکی نا سوب آن ننا صنعت آتیا ہم دباؤ ودانے۔ نیلم جہلم ڈٹ انا بنائی تخمینہ 80 ارب روپئی ئس، 10 سال اٹی اودے پورو کروئی ئس ولے دا 20 سال اٹی 500 ارب روپئی آن پورو مسنے۔ اوپارے کہ دیامر بھاشا ڈیم انا کسہ ءِ ہم 2000ء آن نن بنسا بننگ اُن۔ جنرل (ر) پرویز مشرف، آصف علی زرداری، یوسف رضاگیلانی و میاں نواز شریف دانا واری واری آ بنداو ءِ تخار ولے داڈٹ ہم داسکان کاغد آتے ٹی ءِ۔
