اسلام آباد۔ 17 اکتوبر (اے پی پی) بنجائی وزیر کانود بیرسٹر فروغ نسیم پارینے کہ آئین و نیب انا کانود نا رداٹ عدالت اٹی زیر سماعت مقدمہ غاتیا ایوان اٹی شرہ مننگ کپک ، نیب آزادءُ ادارہ اسے ، نیب انا کانودی ٹک اسے آ اگہ اعتراض مسکہ تو دا تینا دورحکومت اٹی داٹی بدلی ایسکہ۔ چارشنبے نادے قومی اسمبلی ٹی قائد حزب اختلاف شہباز شریف نا کنڈآن چست کروک آ ٹک آتا ورندی ءِ ترسا بیرسٹر فروغ نسیم پارے کہ قائد حزب اختلاف کمیٹی نا ٹہیفنگ نا ہرا خواست ءِ کرینے کانودی وڑاٹ دُن مننگ کپک۔ نیب آرڈیننس نا دفعہ 36نار داٹ دُن مننگ کپک ۔ اوپارے کہ قائد حزب اختلاف نا ایوان اٹی حاضری نا بابت اسپیکر ہراتم رابطہ کرے تو بطور وزیر کانود ای اودے رول 108 نا رداٹ ہڑتوم آ حالیت آتا وضاحت کریٹ ولے اسپیکر گچین طرزعمل نا درشانیءِ کرے و گچین وڑاٹ معاملہ غاتے مون آ درے۔ اوپارے کہ سیکشن 31 مسہ اے انا رداٹ عدالت اٹی زیر سماعت ہر معاملہ ٹی ایوان آ شرہ مننگ کپک۔ ہنداوڑ آرٹیکل 240 نا رداٹ ہم دانا ممانعت ءِ کننگانے انتئے کہ داٹی توہین عدالت نا کیس ہم جوڑ مننگ کیک۔کنا خواست ءِ کہ دا ایوان کانود نا عدالت اف و نئے نن کانودی فیصلہ اس کننگ کینہ۔ اوپارے کہ اگہ کانود نا عملداری نا ہیت ءِ غٹ کننگ ءُ تو نن بایدے اوڑآ عمل کین۔ نیب اسہ آجو ءُ ادارہ اسے، حکومت نیب انا معاملہ غاتے ٹی نیام تمپننگ ءِ۔
