کوئٹہ۔ 17اکتوبر (اے پی پی) صوبائی وزیر خزانہ میر عارف جان محمد حسنی پارینے کہ وزیراعلیٰ بلوچستان جام کمال خان نا کماشی ٹی بلوچستان اٹی شونداری و شونہالی و گچین کن کوشست کننگ اُن۔ داخیال آتا درشانی ءِ او ڈی سی ہاؤس نوشکی ٹی ضلعی آفیسر آتا دیوان آن تران کرسا پارے کہ کرپشن بدعنوانی نا داغ ءِ ننے صاف کروئی ءِ، اوضلعی آفیسر آتے سختی اٹ پارت کرے کہ او ٹیم ورک انا دروشم اٹ کاریم کرسا الس ءِ زیات آن زیات ریلیف تننگ نا کوشست کیر۔ ڈیوٹی آن غیر حاضری و ڈیوالائی کروک آتا برخلاف سخت کارروائی کننگک ، ہچ گہس ءِ اٹیچ منٹ نا موکل اف ، اٹیچ منٹ آ پورو پابندی ءِ۔ خلاف ورزی کروک آ ڈی اوتا برخلاف کارروائی کننگک، اگہ آفیسر اسے ضلع غان پیشن ہنوئی ءِ تو ڈپٹی کمشنر آن موکل ہلنگ المی ءِ، اوپارے کہ ننا اصل مسخت الس نا خذمت کننگ نا ءِ و کنا درگہ الس کن ہروخت ملوک ءِ چاغی آمبار نوشکی ہم کنا اُراءِ ، وخت وخت آ نوشکی و چاغی نا دورہ ءِ کرسا الس نا ویل آتے بننگ و اوفتے ایسر کننگ کن ہر کہول آ کوشست کیوہ ، انشاء اللہ الس زوت ہی گچینی محسوس کیک۔ صوبائی وزیر خزانہ غٹ ضلعی آفیسر آتے پارت کرے کہ او تینا محکمہ غاتا ویل آتا غٹ کوائف آتے پورو کرسا تینا تعلقدار سیکرٹری تا کمک اٹ کنے آ گدریفر تانکہ نن نما ویل آتے ایسر کرفنگ کین ۔ میر عارف جان محمد حسنی نوشکی ٹی میرج ہال اسے نا جوڑ جاڑ نا وعدہ کرے و نوشکی گریڈ آن ضلعی ہیڈ کوارٹر ہسپتال ءِ 24گھنٹہ بجلی فراوان کننگ نا یخین دہانی کرفے نوشکی و چاغی ٹی الس ءِ جان جوڑی نا گچین آسراتی تا فراوانی کن ٹراما سینٹر نا جوڑ کننگ و 50 کٹ والا ہسپتال نا کاریم ءِ دُوارہ بناکرفنگ نا یخین دہانی کرفے ۔ اوپارے کہ رخشان ڈویژن نا ٹہیفنگ آن علاقہ ٹی شونداری و شونہالی نا پوسکن ءُ دور اس بناکیک ڈویژن نا نان ڈویلپمنٹ کن چار ءُ نیم کروڑ روپئی جاری کننگا و کمشنر نا تقرری ءِ عمل اٹ اتنگانے ۔ داوخت آ ڈپٹی کمشنر عبدالرزاق بلوچ صوبائی وزیر خزانہ میر عارف جان محمد حسنی ءِ نوشکی ڈسٹرکٹ اٹی شونداری ڈٹ و امن و ایمنی نا بابت سرجم احوال تس۔
