اسلام آباد۔ 16اکتوبر (اے پی پی) بنجائی وزیر اطلاعات ونشریات چوہدری فواد حسین پارینے کہ ساڑی آ ضمنی گچین کاری تیٹی پاکستان تحریک انصاف غٹ آن زیات 11لکھ وونٹ ہلک، پی ٹی آئی و سیوتی جماعت آک 17 نشست آتیاسرسہبی دوئی کرینو،پی ٹی آئی حکومت اولیکو وار ضمنی گچین کاری تیٹی پوسکن ءُ کلچر اس درستی راستی کرفینے، وزیراعظم ، وزیرا علاک ضمنی گچین کاری والا حلقہ غاتیاہنتوس و نئے ہموڑے پرائر پورٹس تون اوار بھلا بھلا ڈٹ آتا پڑو ءِ کریر، پی ٹی آئی حکومت ضمنی گچین کاری تیان پورو لاتعلق ئس۔ سے شنبے نادے پریس کانفرنس اٹی اسہ سوج اسے نا ورندی ٹی اوپارے کہ پی ٹی آئی ساڑی آ ضمنی گچین کاری ٹی غٹ آن زیات وونٹ ہلسا ثابت کرینے کہ پاکستان نا الس پی ٹی آئی تون ءِ۔ اوپارے کہ اولیکو وار ضمنی گچین کاری کن ضلع غاتا کہول آ جوڑ کروک کمیٹی تا سرکڑدہ ہی ءِ ڈی سی ، پولیس ، ریونیو آفیسر آتے تننگ تنے۔ اوپارے کہ مچ آ اپوزیشن اواری اٹ ہم پی ٹی آئی ءِ کٹنگ کتوس ، بنوں و اٹک نا نشست آتے پی ٹی آئی نا اومیت دار آک باتسنو انتئے کہ ہموڑے کیہی اومیت دار آک سلوک ئسر ہرانا فائدہ ایلو پارٹی نا اومیت دار آتے مس۔ اوپارے کہ جہلم نا صوبائی اسمبلی نا نتیجہ غاتا سرکاری پڑو متو داسکان گڑاس وونٹ آتا پرخ ءِ۔
