قائد ملت لیاقت علی خان شہید نا 67می برسی ءِ شان و شرف اٹ اڈتننگا
ننے لیاقت علی خان نا جوڑ کروک آ روشنا کسر و اونا اختیار کروک اصول آتا سختی اٹ پیروی کننگ نا گرج ءِ
اسلام آباد۔ 16اکتوبر (اے پی پی) پاکستان نا اولیکووزیراعظم قائد ملت لیاقت علی خان شہید نا 67می برسی سے شنبے نادے شان و شرف اٹ اڈتننگا۔ داوخت آ تینا کلہو اٹی صدر مملکت ڈاکٹر عارف علوی قائد ملت لیاقت علی خان نا تصور و تعلیم آتا مون آ دننگ نا عزم انا اعادہ ءِ کرسا پارے کہ ننے پاکستان نا ریاست کن لیاقت علی خان نا جوڑ کروک روشناکسر و اونا اختیار کروک اصول آتا سختی اٹ پیروی کننگ نا گرج ءِ۔ صدر مملکت پارے کہ لیاقت علی خان پاکستان نا بانی تیان اسٹ ئس ہرا بابائے قوم قائد اعظم محمد علی جناح ؒ تون اواری اٹ برصغیر نا مسلمان تے کن جتا ءُ وطن اسے نا دوئی کننگ کن است جمی اتون جہد کرے۔ اونا خذمت آک تحریک آجوئی نا تاریخ اٹی روشن ءُ بشخ اسے ءُ۔ پاکستان نا اولیکو وزیراعظم و قائد اعظم نا بے کچ با پت رفیق کار نا حیثیت اٹ او پوسکن آ ریاست خاص کر مہاجر آتا بحالی کن بھلو خذمت اس انجام تس۔ او ہمو نازرک وخت اٹی حکومت ءِ سنبھالا ہراتم کیہی تہہ نا و پیشن نا چیلنج آک مون تروک ئسر ولے او دازمواری ءِ جوانی اٹ انجام تس۔ او جمہوری اقدار نا پبی مخ تف و پیروکار ئس و او جمہوری ادارہ غاتا بنداو ءِ تخنگ کن سخت خواری کرے و اونا شونداری کن ہم کسر ءِ آوار کرے۔ صدر پارے کہ 16اکتوبر 1951ء آ اسہ المناک واقعہ اسے ٹی قومی اسہ عظیم ءُ راہشون اسے آن محروم مس ولے پاکستان نا جوڑ کننگ آن مست و اوکان پد اونا خذمت آتے مدام یات تخنگک۔ نواب زادہ لیاقت علی خان نا شمار بابائے قوم قائد اعظم محمد علی جناح نا خڑک انگا سنگت آتے اٹ مسکہ۔ لیاقت علی خان نا برسی نا وخت آ ملک انا چندی بشخ آتے ٹی دود آتے اڈتننگا وخت اس کہ پرنٹ و الیکٹرانک میڈیا آن خصوصی رپورٹ و پروگرام شینک و نشر کننگا۔ لیاقت علی خان شہید انا مزار آ اونا خاہوت و بھلو کچ اسے ٹی خلقت حاضری تس۔ فاتحہ خوانی کریر و پھل آتا چادر اس شاغار و قائد ملت ءِ اونا قومی خذمت آتیا خراج عقیدت پیش کریر۔ لیاقت علی خان نا برسی نا چرجوئی ٹی جتا جماعت آتا رداٹ سیمینار ، کانفرنس و چندی دوس آتا بست وبند ہم کننگا۔
