اسلام آباد۔ 16اکتوبر (اے پی پی) اسپیکر قومی اسمبلی اسد قیصر پارینے کہ ملک ءِ مون تروک ویل آتیان کشنگ کن غٹ صوبہ غاتے بنجاتون اواری اٹ خصوصی گام گیج چست کروئی مریک، ملکی تنکی نا مون ءِ توننگ کن مشکل فیصلہ کروئی مریک، پاکستانی قوم مشکل حالیت آتا مقابلہ ءِ کننگ چاہک۔ سے شنبے نادے قومی اسمبلی سیکرٹریٹ آن جاری پریس ریلیز نا رداٹ داخیال آتا درشانی ءِ او اسپیکر خیبر پختونخوا اسمبلی مشتاق غنی تون ہیت وگپ کرسا کرے۔ اوڑدہی ٹی ساڑی آ سیاسی، معاشی و اقتصادی معاملہ غاتون اوار تین پہ تینی است خواہی نا معاملہ غاتیا خیال آتا درشانی ءِ کننگا۔ اسپیکر قومی اسمبلی پارے کہ ملک ءِ مون تروک ویل آتیان کشنگ کن غٹ صوبہ غاتے بنجاتون اواری اٹ خصوصی گام گیج چست کروئی مریک ۔ ملک داخت آ اسہ مشکل ءُ معاشی دور اسے آن گدرینگ انگ ءِ ، داتنکی نا مون ءِ توننگ کن مشکل فیصلہ کروئی مریک۔ اسپیکر قومی اسمبلی پارے کہ معاشی تنکی تون مون تننگ کن کفایت شعاری مہم آ حقی وڑاٹ عمل کننگ نا گرج ءِ۔ اوپارے کہ پاکستانی قوم اسہ بہادر و ثابت قدم ءُ قوم اسے او مشکل حالیت آتا مقابلہ ءِ کننگ چاہک۔ بنجا و صوبہ غاتے کانود سازی نا کمک اٹ السی وڑانا اہم ویل آتے اولیتی بنداو تیا ایسر کننگ نا گرج ءِ۔ اسپیکر قومی اسمبلی پارے کہ بنجا صوبہ غاتے مون تروک ویل آتا ایسری و صوبہ غاتے پورو بااختیار جوڑ کننگ اٹ سنجیدہ ءِ۔ اوقومی و صوبائی اسمبلی تا نیام اٹ رابطہ غاتا مون آ دننگ نا گرج آ زور شاغا۔ اواسپیکر خیبر پختونخوا اسمبلی مشتاق غنی ءِ باوری ترفے کہ کانود سازی و عملہ نا کاریم نا کچ اٹی ودکی کن ہروڑ کمک فراوان کننگک۔ مشتاق غنی پارے کہ صوبائی حکومت بنجاتون ہم کوپہ سلوک ءِ۔ ملک ءِ تنکی تیان کشنگ پارلیمان اٹی ساڑی آ غٹ سیاسی جماعت آتا اسیجائی زمواری ءِ۔ ملکی ویل آتا ایسری کن غٹ سیاسی جماعت آتے اوار درسا ہنوئی مریک۔
