سکھر۔ 16اکتوبر (اے پی پی) پاکستان ریلوے سندھ انا تہٹی اِرا پوسکن ءُ مسافر ٹرین روہی ایکسپریس و موہنجو داڑو ایکسپریس نا بناءِ کرے۔ بنجائی وزیر ریلوے شیخ رشید احمد سکھر اسٹیشن آ پاکستان ریلوے نا کنڈآن چلیفنگوک آ 213 اپ و 214 ڈاؤن موہنجود اڑو فاسٹ پسنجر ٹرین و 215 اپ، 216 ڈاؤن روہڑی فاسٹ پسنجر ٹرین نا بناءِ کرے۔ بناءِ کننگ آن پد صحافی تتون ہیت وگپ کرسا بنجائی وزیر پارے کہ 100 دے اٹی سندھ آن پین مسہ پوسکن ءُ ٹرین چلیفنگک، 30 دسمبر اسکان مچ آ ملک اٹی ٹرین تا جال اس شاغنگک و فریٹ ٹرین تا بناءِ کننگک۔ اوپارے کہ ہندا تُو ریلوے نا بابت وزیراعظم نا کماشی ٹی اہم دیوان اس مریک۔ اوپارے کہ ریلوے ٹی ہچ ءُ پالیسی اس بدل کتون، ریلوے ءِ سہی کرسا نشان ایتیوہ، پورو کوشست ءِ کہ ریلوے ٹی دہ ہزار پوسکن ءُ بھرتی کیو، 2031 بھرتی تا موکل ملانے، ریلوے تون اسہ لکھ 96ہزار ایکڑ ڈغار ارے ولے ہچ ءُ کچی آبادی اسے چٹفنگپک ولے کراچی نا آئی آئی چند ریگر روڈ اتون اوار مچ آ ملک اٹی ریلوے نا اہم نہادی پلاٹ آتے کاریم اٹ اتنگ اٹی اوفتیا کوزہ ءِ ختم کرفنگ نا پارت جاری کرینے۔ شیخ رشید احمد پارے کہ وزیراعظم نا چین نا دورہ اہم ءِ۔ اگہ ای دورہ ٹی ہناٹ تو چین اتون ریلوے کن ایل ایم ون و ایل ایم ٹو آ ہیت کیوہ۔ اوپارے کہ پاک چین سنگتی ہمالیہ آن سوگو ءِ و دادے ریلوے ناکمک اٹ پین سوگو جوڑ کننگ مریک۔ اوپارے کہ ہرا 51لوکوموٹو تے ہلنگا او دگنی نرخ آ ہلنگار، بھارت ہمودے اسہ لوکوموٹو اس 20 کروڑ ٹی ہلک ولے نن ہمو لوکوموٹو ءِ 41کروڑ اٹی ہلکن۔ داوخت آ او سکھر آن پین اسہ پوسکن ءُ ترند رفتار ٹرین اس چلیفنگ نا ہم پڑو ءِ کرے۔
