اسلام آباد۔ 16اکتوبر (اے پی پی) وزیر مملکت مواصلات مراد سعید پارینے کہ ملک آن وی آئی پی و پروٹوکول کلچر نا چٹفنگ، زیات گاڈی تخوک آ ادارہ و آفیسر آتا برخلاف کارروائی و وڈی خوری ءِ چٹفنہ، 50 لکھ اُرا تا ڈٹ آ کاریم نا بنا مسنے، دونیم کروڑ چناتے اسکول آ گدریفنگ نا عزم کرینن، زوت مشکل وخت آن پیش تمنہ۔ داخیال آتا درشانی ءِ او وزارت مواصلات نا ذیلی ادارہ این ایچ اے نا کنڈآن چنکا بھلا 76گاڈی تا نیلامی نا وخت آ صحافی تتون ہیت وگپ کرسا کرے۔ اوپارے کہ ادارہ غاتے ٹی وڈی خوری ناسور آمبار تالان مسنے، گاڈی تا نیلامی آن حکومت پروٹوکول نا نظام ءِ چٹفینے۔ آفیسر آک 15، 15 ، 20 ، 20 گاڈی تخاسر ، الس نا پیسہ غاتے ٹی عیاشی کریرہ، زائیفہ و چناتے جتا جتا گاڈی تسوسر، ملک اٹی فضول خڑچی نا رواج ئس، الس نا پیسہ غاتے اٹ بھلو بھلو گاڈی ہلسا عیاشی کن کاریم اٹ اتنگارہ۔ داسہ دُن مفک۔ کانودی موکل اٹ زیات گاڈی تخوک آ ادارہ و آفیسر آک کانود نا شکنجہ ٹی بریرہ۔ اوفتا برخلاف کارروائی کننگک۔ اوپارے کہ این ایچ اے ٹی شیف آن ہلیس بڑزاسکان وڈی خوری ءِ چٹفنہ۔ کنا وزارت اٹی وڈی خور آفیسر و کارندہ غاتے کن ہچ ءُ جاگہ اس اف۔ اسہ سوج اسے نا ورندی ٹی اوپارے کہ وزارت مواصلات نا ذیلی ادارہ این ایچ اے نا جم وڑاٹ 219 گاڈی تے نیلام کننگک ہرافتیان این ایچ اے ہیڈ کوارٹر اٹی 76گاڈی تا نیلامی نا عمل اینو ہی پورو کننگک۔ اسہ پین سوج اسے نا ورندی ٹی اوپارے کہ جمہوریت نا مطلب الس نا دولت ءِ پلسا عیاشی کننگ اف بلکن دا الس نا شونداری و شونہالی کن پیسہ غاتے خڑچ کننگ نا پن ءِ۔
