اسلام آباد۔ 15اکتو بر (اے پی پی) چین پاکستان اقتصادی راہداری ڈٹ (سی پیک) نا پروجیکٹ ڈائریکٹر حسن داؤد بٹ پارینے کہ تھر 2030 ء ٹی پاکستان اٹی توانائی نا کیپٹل مریک، شیڈول آن 6تُو مست تھر کول پاور پلانٹ نا اولیکو یونٹ آن 330 میگاواٹ بجلی قومی گریڈ اٹی اوار مریک۔ داخیال آتا درشانی ءِ او ’’اے پی پی‘‘ تون ہیت وگپ کرساکرے۔ حسن داؤد بٹ پارے کہ سی پیک نا رداٹ ہائیڈل، کول، شمسی ، ونڈ اتون اوار چندی ڈٹ آتیا کاریم برجاءِ ہراٹی چندی ڈٹ آتیان پیداوار بناکرینے ولے گڑاس ڈٹ آتیا کاریم آخیریکو مرحلہ غاتے ٹی جاری ءِ۔ اوپارے کہ داوخت اسکان کول مائننگ نا 92درسد وخت اس کہ پاور پلانٹ نا 93درسد کاریم پورو مسنے۔ تھر بلاک ٹو اٹی کول مائننگ و پاور پلانٹ نا جوڑ جاڑ نا کاریم 2016ء ٹی بناکرے ہرادے جون 2019ء اسکان پورو مروئی ئس ولے رفتار ترند مننگ نا سوب داسہ 6 تُو مست بجلی نا پیداوار نا عمل بناکیک۔ اوپارے کہ تھر بلاک ٹوآن مٹیاری اسکان 270 کلومیٹر مریس ٹرانسمیشن لین ءِ 270 ملین ڈالر نا خڑچ اٹ پورو کننگانے وخت اس کہ ہڑتوم آ کول مائننگ و پاور پلانٹ آ کاریم برق رفتاری اٹ برجاءِ و دا پوروی نا خڑک آٹی ءِ۔ اسہ سوج اسے آ اوپارے کہ مائننگ نا کاریم 154میٹر نا گہرائی اسکان سرمسنے، داکان دوئی مروک آ کولانا معیار اعلیٰ ءِ و خُتنگ تون اوار اوار پین گچین ءُ کولا مون آ بننگ ءِ ، اولیکو مرحلہ ٹی تھر کول پروجیکٹ نا رداٹ 3.8 ملین ٹن کولا دوئی کننگک ہراڑآن 2پاور پلانٹ چلیفنگک۔ ہر اسہ پلانٹ 330 میگاواٹ نا پیداوار نا کچ انا حامل مریک ہرادے پدریسہ ودفنگک و 2024ء اسکان داڑآن پنچ ہزار 200 میگاواٹ بجلی دوئی مریک۔
