داکڑزآک ہراڈٹ آتیاخڑچ مسر، دافتیان ہراآبی کوڑی تے جوڑ کننگا، داپیسہ غاک ہرانگ ہنار، ہرا بھلا ڈٹ آک پورو مسر، داڑآن ملک ءِ انت فائدہ اس مس
وزارت خزانہ ءِ کڑز ہلنگ نا سوب و اوفتا کاریم اٹ اتنگ نا سرجم جاچ پیش کننگ نا پارت
اسلام آباد۔ 11اکتوبر (اے پی پی) وزیراعظم عمران خان گدرینگوک آ 10 سال اٹی وام تا کچ 6 ہزار ارب روپئی آن 30 ہزار ارب روپئی اسکان ودنگ آ گڑتی نا درشانی ءِ کرسا وزارت خزانہ ءِ پارت کرینے کہ او گدرینگوک آ 10 سال اٹی ہلوک آ وام تا سوب و اوفتا کاریم اٹ اتنگ نا سرجم جاچ ءِ پیش کننگے۔مستین نا وام تا قسط آتا ادائیگی کن پین وام ہلوئی تمنگ ءِ، پوسکن آ پاکستان ہاؤسنگ ڈٹ بے کچ اہم ءِ دانا پوروی آن ننا معیشت اٹی نمان گچینی بریک۔ پنچ شنبے نادے آ وزیراعظم آفس اٹی بنجائی کابینہ نا دیوان نا کماشی ءِ کرسا اووزارت خزانہ آن وام تا سرجم آتے ہریفینے و پارت کرینے کہ دا سرجم آتے تننگے کہ دا وامک ہراڈٹ آتیا خڑچ مسنو، دافتیان ہرا آبی کوڑی تے جوڑ کننگانے ، دا پیسہ غاک ہرانگ ہنار، ہرا بھلا ڈٹ آک پورو مسر، داڑآن ملک ءِ انت فائدہ مس۔ اوپارے کہ گدرینگوک آ 10 سال اٹی ہلوک آ وام 6ہزار ارب روپئی آن ودسا 30 ہزار ارب روپئی اسکان سرمسنو۔ وزیراعظم پارے کہ داڑے ہرا کڑز آتے ہلنگا اوفتا قسط آتا ادائیگی کن پین کڑز ہلوئی تمنگ ءِ۔ اوپارے کہ ملک کڑزدار ءِ اگہ ننے کڑز ہلوئی ءِ تو کابینہ ءِ دابارواٹی سجفوئی مریک کہ دا کڑز آتیان پیسہ جمع مرے تانکہ داکڑز آتا ادائیگی نا قابل مرے۔اوپارے کہ مستین نا کڑز آتا قسط آتے ادا کننگ کن پین کڑز ہلوئی تمنگ ءِ۔ وزارت خزانہ اوناسرجم جاچ ءِ بنجائی کابینہ ءِ پیش کے۔ داڑآن وام تا و اونا قومی معیشت آ اثر آتا بارواٹ گچین فہم ودکی مریک۔ وزیراعظم پارے کہ 50لکھ اُرا جوڑ کننگ نا غٹ آن زیات اہم و شاندار ڈٹ اسے، داڑکن پورو اسٹرکچر اس جوڑ کننگ اُن۔ اتھارٹی قائم کننگ انگ ءِ۔ ون ونڈو آپریشن نا کمک اٹ ڈٹ انا بناءِ کننگ اُن۔ داڈٹ ءِ اولیتی بنداو تیا ایسری اسکان سرکننگک۔ داڈٹ آن نئے بیرہ ننا معیشت اٹی نمان گچینی بریک بلکن ورکر آتا مہارت اٹی ودکی و روزگار نا وارخواہی ودی مریک۔
