اسلام آباد۔ 10اکتوبر (اے پی پی) ڈپٹی چیئرمین سینیٹ سلیم مانڈوی والا یورو ایشیائی ملک آتا پارلیمنٹ نا دیوان اٹی بشخ ہلنگ نا وخت آ انڈونیشیا ، تھائی لینڈ و بوسنیا و ہرزوگوینیا نا ڈل آتون ہڑتوم آ کنڈآتا معاملہ غاتیا اوڑدہی کرے۔ ڈپٹی چیئرمین سینیٹ یورو ایشیائی ملک آتا پارلیمنٹ نا دیوان اٹی پاکستانی ڈل انا کماشی ءِ کننگ ءِ۔ ڈل اٹی سینیٹر محسن عزیز، خوش بخت شجاعت، نصیب اللہ بازئی، باسک قومی اسمبلی جنید انوار و عامرایوب اوار ءُ وخت اس کہ ترکی ٹی پاکستان نا سفیر ساجد قاضی ہم ڈل اتون اوار ءِ۔ یورو ایشیائی ملک آتا پارلیمنٹ نا دیوان 8 آن 11اکتوبر 2018 ء آ ترک شار اناطولیہ ٹی مننگ ءِ۔ دیوان نا مسخت یورو ایشیاٹی پائیدار شونداری و معاشی رابطہ غاتے مون آ دننگ ناءِ۔ پاکستانی ڈل انڈونیشیا نا ہاؤس آف ریپریز ینٹیٹیو ڈاکٹر فادلزون تون اوڑدہی ٹی انڈونیشیا ٹی ساڑی آ زمی جمب اٹی نہادی جان تا زیان آ است ہسونی و ڈکھ انا درشانی ءِ کرسا پاکستان نا کنڈآن ہروڑنا کمک نا پیش کش کرے۔ ہڑتوم آ کنڈآک خڑکی دوستانہ تعلقداری نا عزم انا درشانی ءِ کریر و دا تعلقداری تے پین سوگو جوڑ کننگ وپارلیمان نا کہول آ رابطہ غاتے مون آ دننگ آ زور شاغنگا۔ انڈو نیشیا و پاکستان نا نیام اٹ کاروباری واپاری تعلقداری تے ٹی پین آسانی ودی کننگ کن کانودی فریم ورک اس جوڑ کننگ نا گرج آ ہم زور شاغنگا۔ ڈپٹی چیئرمین سینیٹ سلیم مانڈوی والا سلاہ تس کہ انڈونیشیا پاکستانی تے کن ویزہ نا نظام اٹی آسانی ودی کے تانکہ کسب کار افرادی واک انڈونیشیا غا ہِننگ کیر۔ داوخت آ تھائی لینڈ نا قومی کانود ساز اسمبلی نا ڈل انا سروک اتون اوڑدہی ٹی ڈپٹی چیئرمین سینیٹ سلیم مانڈوی والا پاکستانی تہذیب و دودوربیدگ نا بابت پارے کہ بدھسٹ تپہ کن پاکستان نا شار ٹیکسلا بھلا واپاری بنجاءِ۔ ہڑتوم آ کنڈآتیان تین پہ تینی است خواہی نا معاملہ غاتیا خیال آتا درشانی ءِ کننگا۔ پاکستانی ڈل بوسنیا اینڈ ہرزگوینیا نا ڈل انا سروک سیفٹ سیفٹک تون ہڑتوم آ کنڈآتا معاملہ غاتیا خیال آتا درشانی ءِ کریر۔ ہڑتوم آ کنڈآتیان ہڑتوم آ کنڈآتا تین پہ تینی است خواہی نا چندی بشخ آتے ٹی تعلقداری تے پین مون آ دننگ آ رضامندی ظاہر کننگا۔ بوسنیا نا ڈل انا سروک پارے کہ ننا خلقت پاکستان تون جذباتی وابستگی تخک۔ ڈپٹی چیئرمین سلیم مانڈوی والا پارے کہ بوسنیا پاکستان نا دوست ملک ءِ و پاکستان بوسنیا نا ہروڑ کمک ءِ برجاتخک۔
