ڈپٹی اسپیکر قومی اسمبلی قاسم خان سوری نا کوئٹہ ٹی سردار بہادر خان وویمن یونیورسٹی نا دورہ نا وخت آ استاد و طالب علم آتیان تران

کوئٹہ۔ 10اکتوبر (اے پی پی) ڈپٹی اسپیکر قومی اسمبلی قاسم خان سوری پارینے کہ سردار بہادر خان وویمن یونیورسٹی ٹی 10 ہزار طالب علم آتا خواننگ بلوچستان نا روشنا آخبت نا ضمانت ءِ ، ننا ملک انا نیمہ آبادی زالبول آتیاتالان ءِ ہنداخاطرآن یونیورسٹی ٹی خوانوک آ طالب علم آک علم بیرہ نوکری نا دوئی کننگ کن کپس بلکن پٹ وپول نا پڑ اٹی تینا توانائی تے خڑچ کیر، بلوچستان نا طالب علم آتے ٹی ٹیلنٹ ارے اگہ اوفتے وارخواہی تننگے تو صوبہ نا ہونہار طالب علم آک ملک وقوم انا پن ءِ روشن کننگ کیرہ، بلوچستان نا شونداری ٹی زالبول نا کڑد ءِ اصل گوجالنگ مفک ، اسہ خوانوک ءُ نیاڑی اس مچ آ اُراءِ علم انا شمع آن روشناس کرفنگ کیک ، داہیت ءِ او چار شنبے نادے آ سردار بہادر خان وویمن یونیورسٹی کوئٹہ نا دورہ نا وخت آ طالب علم و استاد آتیان تران کرساپارے ، داوخت آ وائس چانسلر سردار بہادر خان وویمن یونیورسٹی کوئٹہ پروفیسر ڈاکٹر رخسانہ جبین و ایلو عہدیدار آک ہم ساڑی ئسر ۔ قاسم خان سوری پارے کہ پاکستان ءِ عظیم آن عظیم تر جوڑ کننگ کن پاکستان تحریک انصاف نا بنجائی حکومت تعلیم ءِ تینا اولیت آتے ٹی تخانے و وزیراعظم عمران خان نا کماشی ٹی نن انشاء اللہ بلوچستان اٹی زالبول طالب علم آتے کن پین تعلیمی ادارہ جوڑ کینہ، ڈپٹی اسپیکر قومی اسمبلی پارے کہ چیئرمین پاکستان تحریک انصاف وزیراعظم عمران خان لاہور ، پشاور و کراچی ٹی خوانوک آ طالب علم آتے پارت کرے کہ او تینا تینا بشخ آتے ٹی جوان محنت کرسا پاکستان و بلوچستان نا پن ءِ روشن کیر انتئے کہ پاکستان ننا ملک ءِ و اونا شونداری ننے غٹ آ لازم ءِ، ڈپٹی اسپیکر قاسم خان سوری یونیورسٹی نا کلاس روم، سیکورٹی کنٹرول روم، لائبریری و جتا بشخ آتا جاچ ءِ ہلک وخت اس کہ سردار بہادر خان وویمن یونیورسٹی نا وائس چانسلر ڈاکٹر رخسانہ جبین ڈپٹی اسپیکر قومی اسمبلی قاسم خان سوری ءِ یات گاری شیلڈ اس پیش کرے۔