خراب انگا شربت آتیان ملک اٹی شوگر و ایلو ناجوڑی تیٹی ودکی مننگ ءِ
اسلام آباد۔ 09 اکتوبر (اے پی پی) بنجائی وزیر جان جوڑی عامر محمود کیانی بنجائی و صوبائی وزیر تعلیم آتیان تعلیمی ادارہ غاتا تہٹی و 100 میٹر نا دنگ اٹی خراب انگاشربت آتابہاء کننگ آ پابندی نا درخواست کرینے۔ سے شنبے نادے تینا اسہ بیان اسے ٹی بنجائی وزیر جان جوڑی پارے کہ خراب انگا شربت آتیان ملک اٹی ذیابطیس(شوگر) و ایلو ناجوڑی تیٹی ودکی مننگ ءِ۔ خراب انگا شربت آتے ٹی بورہ نا زیات کچ انا سوب چناتا اولونی ٹی ودکی مننگ ءِ۔ اوپارے کہ جہانی ادارہ جان جوڑی نا پٹ وپول نا رداٹ اولونی ، است انا بیماری، کینسر و ایلو ناجوڑی تا سوب جوڑ مننگ کیک۔ ساڑی آ قومی ذیابطیس سروے 2016-17ء نا رداٹ پاکستان اٹی 26درسد بالغ بندغ آک ذیابطیس نا گواچی ءُ۔ امریکن ہارٹ ایسوسی ایشن نا رداٹ 2آن 18 سال انا وئی نا چناتے ہردے 6 چمچہ آن کم بورہ کاریم اٹ اتوئی مرے۔ یات سلے کہ پنجاب و سندھ فوڈ اتھارٹیز تعلیمی ادارہ غاتا تہٹی و 100 میٹر نا دنگ اٹی خراب انگا شربت آتا بہاء کننگ آ مست آن ہی پابندی خلکونو۔ داسہ بنجائی وزیر جان جوڑی عامر محمود کیانی بنجائی و کے پی کے، بلوچستان و گلگت بلتستان نا صوبائی وزیر تعلیم آتے اسہ چھٹی اسے ٹی درخواست کرینے کہ او ہم تعلیمی ادارہ غاتے ٹی خراب انگا شربت آتیا پابندی خلیر۔
