اسلام آباد۔ 05اکتوبر (اے پی پی) گوادر پورٹ اتھارٹی نا چیئرمین دوستین خان جمالدینی پارینے کہ گوادر اٹی آزاد اقتصادی زون اٹی 30 انا خڑک کمپنی سرجزآتا بناءِ کرینو ، آزاد اقتصادی زون اٹی دا کمپنیک 474ملین ڈالر نا زرکاری کرینو وخت اس کہ پورو آپریشن آن پد زرکاری نا کچ 790 ملین ڈالر آن گدرینگک۔ دا کمپنی تے ٹی ہوٹل، بینک، لاجسٹکس و سمندری خور انا پراسیسنگ نا بشخ آتے ٹی واپاری سرجز آتا بناءِ کرینو۔ داخیال آتا درشانی ءِ او چین نا گلوبل ٹیلی ویژن نیٹ ورک ءِ انٹرویو ترسا کرے۔ اوپارے کہ گوادر فری اقتصادی زون نا فیز ون نا مست آن ہی بنا مسنے۔ گوادر پورٹ کنیکٹوٹی ، پورٹ کلیکشن ایریا و پیداواری علاقہ تقریباََ تیاری نا آخیریکو مرحلہ غاتے ٹی ءِ و ہر ہفتہ چینی کمپنی سی ای ایس ای او نا جہاز بندرگاہ غا سلک۔ ننے اومیت ءِ کہ اقتصادی زون اٹی صنعتی پیداوار نا بناء تون ہی درملکی جہاز آتا ہن و بر اٹی نمان ودکی مریک۔ اوچین نا صدر شی جن پنگ نا بیلٹ اینڈ روڈ انیشی ایٹو نا ستاءِ کرے و پارے کہ دا وژن نا رداٹ کیہی شاہراہ و راہداری تا ڈٹ بندی ءِ کننگانے ولے چین پاکستان اقتصادی راہداری (سی پیک ) دا وژن نا ترندی اٹ پورو مننگ و گچین ڈٹ اسے۔ دا راہداری آن نئے بیرہ پاکستان نا دیکی چین اتون رابطہ غاتے ٹی ودکی مریک بلکن نیامی ایشیائی ریاست آتسکان رسینگ ءِ ہم مون آ دننگ دوئی مریک۔ داڈٹ آن چین وپاکستان نا نیام اٹ تعلقداری و سنگتی ءِ پین مون آ دننگ دوئی مریک۔
