اسلام آباد۔ 05اکتوبر (اے پی پی) وزیراعظم نا خصوصی کمکار احتساب شہزاد اکبر پارینے کہ پاکستانی تا پیشن نا ملک آتے ٹی دہ ہزار جائیداد آتا پدرند ءِ خلنگانے، ہراڑآ 300 جائیداد آتا مالک آتے نوٹس جاری کننگانے۔ لندن اٹی مسکوہی وزیر خزانہ اسحاق ڈار نا پین اِرا فلیٹ مون آ بسنو۔ تین پہ تینی کانودی کمکار(میوچل لیگل اسسٹنس ) بل و وسل بلوو رایکٹ منظوری کن زوت بنجائی کابینہ ٹی پیش کننگک۔ اوداہیت ءِ جمعہ نادے داڑے بنجائی وزیر اطلاعات و نشریات چوہدری فواد حسین تون اوار پریس کانفرنس کرسا پارے۔ اوپارے کہ کابینہ نا منظوری آن میرات ریکوری یونٹ کاریم نا بناءِ کرینے۔ دایونٹ اٹی نیب، ایف آئی اے، ایف بی آر تون اوار ایلو محکمہ غاتا نمائندہ غاک اوار ءُ۔ دایونٹ برطانیہ و دبئی ٹی پاکستانی تا دہ ہزار آن زیات جائیداد آتا پد رند ءِ خلکنو۔ دافتیان 895 جائیداد آتیا کارروائی کننگک وخت اس کہ 300 جائیداد آتیا نوٹس جاری کننگانے۔ اوپارے کہ غٹ انا برخلاف بے پرخ کارروائی کننگک۔ سیاسی شخصیت (پولیٹیکلی ایکسپوز پیپلز) اٹی غٹ بریرہ، ہرکس ءِ کہ سرکاری عہدہ مسنے وڈی خوری ثابت مننگ آ اونا برخلاف کارروائی کننگک۔ اوپارے کہ پانامہ لیکس اٹی ہرا کمپنی تا پن بسنے اوفتا سرجم آتے بٹنگ انگ اُن۔ تعلقدار ملک آتیان سرجم آتا ملنگ آن پد اوفتا مالک آتیان ہم سرجم آتے بٹنگنہ و ولدا داڑآ کارروائی مون آ مریک۔
