واشنگٹن۔ 03اکتوبر (اے پی پی) پاکستان و امریکہ ہڑتوم آ کنڈآتا و علاقائی اسیجا مسخت آتا دوئی کن رابطہ غاتے استوار کننگ آ امنا کرینو، دا امنائی وزیر خارجہ شاہ محمود قریشی و امریکی وزیر خارجہ مائیکل آرپومپیو نا نیام اٹ تدوک آدے داڑے محکمہ خارجہ ٹی مروک آ اوڑدہی ٹی طے مس ہراٹی تین پہ تینی است خواہی نا گیشتر ہڑتوم آ کنڈآتا و علاقائی معاملہ غاتیا خیال آتا درشان مس ، ہڑتوم آ کنڈآک داہیت آ ہم امنا کریر کہ اوغان طالبان کن دا مناسب ءُ وخت اسے کہ او مذاکرات نا موقع آن فائدہ ہرفسا سیاسی تصفیہ نا موقع آن فائدہ ہرفر۔ چارشنبے نادے ترجمان دفترخارجہ نا کنڈآن جاری بیان نارداٹ وزیر خارجہ ہراتینا امریکی ہم منصب نا سلہ غا واشنگٹن نا سرکاری دورہ ءِ کننگ ءِ، پارے کہ پاکستان وامریکہ نا نیام اٹ خڑکی رابطہ مدام تین پہ تینی وڑاٹ مفید و سویلی ایشیا ٹی سوگوی نا عنصر مسنے۔ اوداہیت آ زور شاغا کہ مون آ ہنوک آوسیع بنداو و ڈھانچہ جاتی فریم ورک ڈائیلاگ ہڑتوم آ ملک آتا اسیجا مفاد آتے کن گچین ثابت مریک۔ شاہ محمود قریشی حکومت نا شونداری و السی چکارتخوک ایجنڈا ءِ تالان کرے ہرا پاکستان نا ہمسائیگی ٹی امن و سلامتی آ منحصر ءِ۔
