اسلام آباد۔ 03اکتوبر (اے پی پی) بنجائی وزیر پٹرولیم غلام سرور خان پارینے کہ کرک انا گیس آن محروم 9 خلق ءِ زوت گیس انا فراوانی نا بناء کننگک ، دا ویل ءِ سنجیدگی اٹ ایسر کننگ اُن، کرک انا 38 آن 29 خلق ءِ گیس فراوان کننگانے۔ چارشنبے نادے آ قومی اسمبلی ٹی شاہد احمد خان نا ضلع کرک اٹی 38 خلق ءِ گیس مفننگ نا سوب چکاری نوٹس نا ورندی ٹی بنجائی وزیر ایوان ءِ پارے کہ دا سوئی ناردرن کن اسہ اہم ءُ معاملہ اسے، کرک اٹی گیس انا پیداوار ہم ارے وخت اس کہ دُزی ہم مننگ ءِ ، دابابت کنا سوئی ناردرن نا کمامدارآتون میٹنگ ہم مسنے، دا ویل ءِ ایسر کننگ خوانہ۔ اوپارے کہ داڈٹ اکن 837 ملین روپئی جتا کننگاسس ہرافتیان 760 ملین بنجائی و صوبائی حکومت فراوان کیک۔ اوپارے کہ داوخت 38آن 29 خلق ءِ گیس تننگانے وخت اس کہ 9 خلق سلوک ءُ۔ داچرجوئی ٹی سمری ای سی سی ءِ گدریفینن و ہندا تُو اونا منظوری نا گمان ارے۔
