وزیراعظم عمران خان نا بنجائی وزیر جان جوڑی ءِ زوت آن زوت تھر انا دورہ ءِ کرسا جان جوڑی آن تعلقدار ویل آتیا رہینگوک آتے ریلیف فراوان کننگ نا پارت
اسلام آباد۔ 02اکتوبر (اے پی پی) وزیراعظم عمران خان تھر انا حالیت آتیا گڑتی نا درشانی ءِ کرسا بنجائی وزیر جان جوڑی ءِ پارت کرینے کہ او زوت آن زوت تھر انا دورہ ءِ کرسا جان جوڑی تون تعلقدار ویل آتیا تھر انا رہینگوک آتے ریلیف فراوان کے۔ بنجائی حکومت سندھ و سندھی تا حق انا رکھ ءِ کیک۔ او داہیت ءِ پاکستان تحریک انصاف سندھ انا صدر امیر بھٹو و سیکرٹری جنرل حلیم عادل شیخ تون ہیت وگپ کرسا پارے ہرافک سے شنبے نادے پارلیمنٹ ہاؤس اٹی وزیراعظم نا چیمبر اٹی اوڑتون اوڑدہی کریر۔ اوڑدہی ٹی خصوصی کمکار وزیراعظم ، نعیم الحق ، افتخار درانی و پاکستان تحریک انصاف نا بنجائی سیکرٹری جنرل ارشدداد ئسک ہم ساڑی ئسر۔ وزیراعظم پاکستان تحریک انصاف صوبہ سندھ انا پوسکن آ صدر و سیکرٹری جنرل آ پورو پت انا درشانی ءِ کرسا اوفتے پارت کرے کہ پارٹی نا منشور آ عمل و پالیسی تے برجاتخنگے۔ اوڑدہی ٹی صوبہ سندھ آن تعلقدار جتا معاملہ غاتیا خیال آتا درشان مس۔ وزیراعظم پارے کہ اونا حکومت سندھ و سندھ انا الس نا حق انا رکھ ءِ کیک۔ اوپارے کہ پاکستان تحریک انصاف سندھ انا کارندہ ننا سرمایہ ءِ ، اوفتا حق انا رکھ ءِ کننگک۔ وزیراعظم صوبائی صدر و سیکرٹری جنرل ءِ پاکستان تحریک انصاف ءِ یونین کونسل نا کہول آ سوگو کننگ وبروک آ بلدیاتی گچین کاری تا تیاری نا ہم پارت کرے۔
