اسلام آباد۔ 02اکتوبر (اے پی پی) وزیراعظم عمران خان پاکستان و چین ءِ جوان ءُ ہمسایہ، سنگت، شریدار و ایلم گوندسا پارینے کہ چین نا آزموندہ سنگتی مدام پاکستان نا الس تون گہری و ہم گرنچ مسنے۔ السی جمہوریہ چین نا قومی دے انا وخت آ چینی وزیر اعظم لی کی کیانگ نا پن آ تینا مبارکبادی نا کلہو اٹی وزیراعظم پارے کہ پاکستانی الس نا است آتے ٹی چین نا خصوصی ءُ ہند اسے۔ اوپارے کہ پاکستان تینا بنداوی تصور آتا رداٹ شونداری نا سفر نا کنڈآ روان ءِ و نن تینا سدا بہار تزویراتی کمکار شریداری ءِ پین سوگوی تننگ و پاک چین اقتصادی راہداری نا وارخواہی تے عملی جامہ اس بیرفنگ کن اواری اٹ کاریم کننگ نا خواہندار اُن۔ وزیراعظم پارے کہ گدرینگوک آ دہائی تیٹی چین نا شاندار شونداری پاکستان تون اوار شون ہلوک ملک آتے کن متاثر کن ءِ۔ اوپارے کہ چین اٹی کروڑ آ خلقت ءِ نیزگاری نا دوآن کشنگ نا معجزہ دنیا کن قابل رشک کارنامہ اسے۔ اوپارے کہ پاکستان نا حکومت و الس قومی شونداری و شونہالی نا کوشست آتے ٹی تینا چینی سنگت آتون مدام سلک۔ عمران خان تینا چینی ہم منصب نا جان جوڑی ، شونہالی کن نیک است خواہی نا درشانی ءِ کرسا پارے کہ او آخبت خڑک اٹی اوڑتون اوڑدہی نا چاری ءِ۔
