اسلام آباد۔ 02اکتوبر (اے پی پی) بنجائی وزیر مواصلات مراد سعید پارینے کہ اسلامی شرحالی و ریاست مدینہ نا قیام ننا ایمان ءِ، انصاف نا گچین ءُ نظام اس تننگ نا کوشست کننگ اُن، ادارہ غاتے ٹی داسہ ’’تینا آخا‘‘ بلکن ’’جوان ءُ بندغ ‘‘ تعینات مریک ، پلوک آ دولت ءِ پدی اتنگ ، خراج نیٹ ءِ ودفنگ کن گام گیج کننگ انگ ءِ ، تحریک انصاف نا حکومت کشمیر و کلبھوشن یادیو نا پن اقوام متحدہ نا جنرل اسمبلی ٹی چست کرے۔ سے شنبے نادے قومی اسمبلی ٹی مولانا اسعد محمود، حناربانی کھر و ایلو باسک آتا چست کروک آ ٹک آتا ورندی ءِ ترسا مراد سعید پارے کہ ننا موقف بھاز صفا ءِ۔ وزیراعظم ملک ءِ مدینہ نا ریاست جوڑ کننگ نا ہیت ءِ کرینے۔ داڑآن کس اسے انت گلہ مننگ کروئے۔ اوپارے کہ کس اس اعتراض کننگ ءِ کہ وزیراعظم ہاؤس ءِ یونیورسٹی اس انت اکن جوڑ کننگ انگ ءِ ، حنا ربانی کھر پارے کہ ملک انا وزیراعظم اِرٹ آخا اسہ پاکستان اسے نا ہیت ءِ کننگ ءِ۔ قوم ءِ جوان یات ءِ کہ داخلقت ادارہ غاتون انت کرینو۔ پیشن آن اسہ پیہن ءُ سے بٹنگسا پی آئی اے اونا حوالہ کننگا ہراک پی آئی اے نا جہاز ءِ دُزار۔ ہراتم تھر انا چناک کہینگ آ ئسرہ تو ننا وزیراعظم اِرغ سرکاری ہیلی کیپٹر اٹی سرکاری وسیلہ غاتے کاریم اٹ اتسا بٹنگاکہ۔ داخلقت 450 ارب روپئی بیدس آڈٹ نا آئی پی پیز آتا حوالہ کریر۔ اینو گردشی کڑز آتا کچ 1100 ارب روپئی آن ودانے وخت اس کہ داہم راست ءِ کہ پیپلزپارٹی نا دور ٹی شارٹ فال 5 ہزار و مسلم لیگ (ن) نا دور اٹی تاریخ اٹی غٹ آن زیات 7 ہزار میگاواٹ ریکارڈ کننگا۔ اوپارے کہ اپوزیشن نا دور تے ٹی ادارہ غاتے ٹی ہراخلقت گچین ءُ کاریم کرے اوفتے یاتو دھڑکو تننگا یا نرنگ آ بیوس کرفنگا۔ اوپارے کہ امریکی اسٹیٹ ڈیپارٹمنٹ نا رداٹ اوفتا دور اٹی لکھ آ ڈالر منی لانڈرنگ نا رپورٹ بس۔ ماڈل ٹاؤن اٹی قوم انا مسن تا پژہ غاتے ٹی ہلسا گر کننگا و مون پہ مون اوفتے سم اٹ خلنگا دانا برعکس حکمران تینا سیکورٹی آ خڑچہ کرسا کریر۔ داسہ سوج آتے چست کننگ انگ ءِ کہ وزیراعظم ہاؤس اٹی یونیورسٹی جوڑ کننگ نا ہیت انت اکن کننگ انگ ءِ۔ نن دا عالیشان ماڑی تا برخلاف گام گیج آتا پڑو ءِ کریسن ۔ اوفتا وزیراعظم نئے بیرہ 30 کروڑ نا بلٹ پروف گاڈی ہلک بلکن 24لکھ روپئی نا کچک ہم ہلنگا۔ 7 ارب روپئی نا خڑچ اٹ اونا اُراتا دیوال آتے بڑز کننگا۔ نن الس نا پیسہ ءِ الس آ خڑچ کینہ۔ بنجائی وزیر پارے کہ خراج نا دنگ اٹی ودکی کن گام گیج کننگ انگ ءِ۔ 35لکھ پوسکن آ خراج گزارآتے خراج نیٹ اٹی اتنگ کن کاریم کننگ انگ ءِ ۔ مراد سعید پارے کہ گاڈی تا نیلامی آ تنقید کننگ انگ ءِ ولے بیرہ کنا محکمہ ٹی 219 گاڈی بیرہ تعلقدار وزیر، سیکرٹری و اونا ماتحت عملہ کاریم اٹ اتسا کرینے ہراڑآ سالانہ مسہ کروڑ نا پٹرول ہم کاریم اٹ اتنگاکہ۔ ہراتم نن مدینہ و اسلامی فلاحی ریاست نا ہیت ءِ کینہ تو ننے آ تنقید شروع مریک۔ مدینہ و اسلامی فلاحی ریاست نا قیام ننا ایمان ءِ۔ نن انصاف نا جوان ءُ نظام اس جوڑکینہ و کرپشن نا مون ءِ تورنہ۔ داسہ ادارہ غاتے ٹی تینا آخا جوان ءُ بندغ تعینات مریک۔
