اسلام آباد۔ 02اکتوبر (اے پی پی) وزیر دفاع پرویز خٹک پارینے کہ یوٹیلٹی اسٹور آتا ملازم و آئی ٹی ٹیچر آتے نوکری تیان کشنگ پننگ انگ ءِ ، جہانگیر ترین ءِ خیبر پختونخواہ ٹی ہچ ءُ کنٹریکٹ اس تننگتنے، عمران خان نا کزن امریکہ ٹی پنی ءُ ڈاکٹر اسے اوتنخواہ ہلپننگ ءِ و تینا خڑچہ غا امریکہ آن دیوان تے ٹی بشخ ہلنگ کن بریک۔ تحریک انصاف نا حکومت سرسہب مریک و دانا صلہ ءِ ننے الس ایتک۔ سے شنبے نادے قومی اسمبلی ٹی مسلم لیگ(ن)نا ڈاکٹر عباداللہ نا کنڈآن ضمنی مالیاتی بل آ چست کروک آ ٹک آتا ورندی ءِ ترسا پرویز خٹک پارے کہ اسمبلی ٹی دروغ تڑنگ آ بایدے سزا تننگے ، پاننگاکہ جہانگیر ترین تون خیبر پختونخواہ ٹی ٹھیکہ ارے، خیبر پختونخوا ٹی جہانگیر ترین ءِ اسہ ہم ٹھیکہ اس تننگتنے۔ اگہ اسہ ٹھیکہ اس ہم ثابت مس تو جرمانہ تننگ کن تیار اُٹ۔ جہانگیر ترین تون اسہ کنٹریکٹ اس ئس ہراننا دور اٹی آخا بلکن گدرینگوک آدور اٹی تننگاسس۔ ہنداوڑ پی پی ایچ آئی ٹی جہانگیر ترین ناہچ ءُ بشخ اس ہلوکہ۔ دروغ آ دروغ انا صلہ اودے گچین کاری ٹی باتننگ نا حالیت اٹ ملانے۔ اوپارے کہ یوٹیلٹی اسٹور آن کس اسے کشنگتنے و نئے آئی ٹی ٹیچر آتے نوکری تیان کشنگ انگ ءِ۔ وزیر دفاع پارے کہ لیڈی ریڈنگ ہسپتال نا بورڈ اٹی وزیراعظم عمران خان نا کزن نا معاملہ ءِ چست کننگانے۔ وزیراعظم عمران خان نا کزن امریکہ نا پنی ءُ ڈاکٹر اسے۔ اوتینا خڑچہ اٹ بورڈ انا دیوان آتے ٹی بشخ ہلنگ کن امریکہ غان بریک۔ او تنخواہ ہم ہلپک۔ بورڈ انا کاریم پالیسی تننگ ءِ۔ دانا تُو اٹی اسہ یا اِرٹ دیوان مریک۔ نن جوان انگا بندغ آتا تعینات ءِ کننگ نا کوشست ءِ کرینن۔ اوپارے کہ کنے بھاز افسوز مریک کہ داایوان اٹی ہڑدے دروغ تڑنگک۔ کنا حکومت آ ہم بناء ٹی ہنداوڑنا دوبہ خلنگاکہ کہ دا ڈلیور کپننگ ءِ ولے نن ڈلیور کرین۔ نن جان جوڑی ، تعلیم و پولیس ءِ گچین کرین و کرپشن آ تالااس خلکن ہرانا صلہ ءِ ننے الس سرسہبی نا دروشم اٹ تسنے۔ نن مراعات یافتہ تپہ کن آخا بلکن الس کن کاریم کینہ۔ نن کفایت شعاری نا پروگرام اس تسونن و دانا صلہ پنچ سال پد الس ننے دُوارہ پبی مینڈیٹ نا کمک اٹ ایتک۔
