اسلام آباد۔ 02اکتوبر (اے پی پی) خیبر پختونخوا حکومت چترال اٹی چین پاکستان اقتصادی راہداری (سی پیک ) نا رداٹ جم وڑاٹ اسہ ہزار 9 سد ءُ 78 میگاواٹ پیداواری لائخی نا 7 بھلا پن بجلی گھر تا جوڑ جاڑ کن چینی کمپنی تتون مفاہمت نا یات داشت آتیا دستخط کرینے ۔ خیبر پختونخوا نا محکمہ توانائی نا کمامدارآک ’’اے پی پی‘‘ ءِ پاریر کہ خیبر پختونخوا نا حکومت چین پاکستان اقتصادی راہداری ٹی 7بھلو ڈٹ اوار کننگ نا ہم سلاہ تسنے۔ داڈٹ آتے ٹی 64 میگاواٹ پیداواری لائخی شہور موجیگرام ، 72میگاواٹ کابونی استور، 350 میگاواٹ نا ریمورترن، 260 میگاواٹ نا مورترن جامشیل، 270 میگاواٹ نا لشت سویر غاریت، 400 میگاواٹ نا تور کیمپ گڈوبار، 446میگاواٹ نا کاری مشکور و اسہ ترسیلی لین اسے نا کمک اٹ چترال آن چکدار اسکان بجلی نا ترسیل اوار ءِ۔ ذرائع پارے کہ 67ایلو چنکا پن بجلی ڈٹ آتیا ہم کاریم ترندی اٹ برجاءِ تانکہ خلقت ءِ ہڑزآن بجلی و کنوئی ءُ صاف دیر فراوان کننگ مرے الس ءِ ہڑزآن بجلی نا فراوانی کن صوبہ نا 12 جہاندمی ضلع غاتے ٹی 255 چنکو پن بجلی ڈٹ آتے پورو کرینے۔
