اسلام آباد۔ 02اکتوبر (اے پی پی) چیئرمین سینیٹ محمد صادق سنجرانی پارینے کہ ملازم آتا شرحالی بے کچ اہم ءِ انتئے کہ دانا اثر براہ راست ادارہ نا کارکڑد آ مریک۔ چیئرمین سینیٹ داخیال آتا درشانی ءِ پارلیمنٹ ہاؤس اٹی سینیٹ سیکرٹریٹ ایمپلائز ویلفیئر فنڈ انا ایگزیکٹو کمیٹی نا دیوان نا کماشی ءِ کرسا کرے۔ صادق سنجرانی پارے کہ ملازم ہر ادارہ کن مخ انا ملی نا حیثیت تخک و ہنداخاطرآن المی ءِ کہ اوفتا شرحالی آ خصوصی چکار کننگے۔ سیکرٹری سینیٹ امجد پرویز ملک ویلفیئر فنڈ انا غرض و مسخت آتا بارواٹ معلومدار کرے۔ کمیٹی نا باسک آک داہیت آ زور شاغار کہ دا فنڈ بے کچ اہم ءِ و دانا مالی حیثیت ءِ پین گچین جوڑ کننگ نا گرج ءِ تانکہ ضرورت مند ملازم و خاص وڑاٹ کم تنخواہ ہلوک آ اسٹاف ءِ زیات آن زیات امداد فراوان کننگ مرے۔ دیوان اٹی دارودرمان تون اوار ایلو مالی کمکاری نا درخواست آتا منظوری ہم تننگا۔
