بنجائی وزیر اطلاعات و نشریات نا سوشل میڈیا غا منظم وڑاٹ جعلی خبر و نوٹیفیکیشن تالان کننگ نا نوٹس
اسلام آباد۔ 01 اکتوبر (اے پی پی) بنجائی وزیر اطلاعات و نشریات چوہدری فواد حسین سوشل میڈیا غا منظم وڑاٹ جعلی خبر و نوٹیفکیشن تالان کننگ نا نوٹس ءِ ہلسا پارینے کہ سوشل میڈیا نا آجوئی ءِ زہمی کننگ آن بیدس ننے جعلی خبر تا برخلاف سخت گام گیج چست کننگ نا گرج ءِ ۔ دوشنبے نادے بنجائی وزیر پاکستان تحریک انصاف نا باسک قومی اسمبلی ملیکہ بخاری نا ٹویٹ ءِ ہم ٹیگ کرے ہراٹی ملکہ بخاری بے نظیر انکم سپورٹ پروگرام نا سروک نا حیثیت اٹ تینا تقرری نا تردید ءِ کرینے۔ تینا ٹویٹ اٹی بنجائی وزیر چوہدری فواد حسین پارے کہ منظم وڑاٹ سوشل میڈیا غا جعلی نوٹیفکیشن و خبر تالان کننگ انگ ءِ۔ بنجائی وزیر پارے کہ دا چرجوئی میڈیا ڈنر نا عکس آن بناکرے و داسہ داوڑنا فضولیات آک جاری ءُ۔ داکان بیدس ملکہ بخاری تینا ٹویٹ اٹی پارینے کہ او دوٹوک وڑاٹ داہیت ءِ ریکارڈ آ اتنگ خواہک و اودے بی آئی ایس پی نا سروک تعینات کننگتنے۔ اوپارے کہ او زلفی بخاری نا رشتہ دار ہم اف۔ ملیکہ بخاری اومیت ظاہر کرے کہ داسہ دارداٹ شرہ چٹک۔
