پی ٹی آئی حکومت ءَ کس ءِ سر ءَ کیس نہ جتگ، پیسرءَ چہ استیں کیس آنی سر ءَ کار بوھگ ءَ اِنت، ڈاکو آنی سر ءَ سزا بندگ ءِ گپ ءَ کن آں ، الیکشن کمیشن ءَ را سندھ اسمبلی ءَ تیمور تالپور ءِ سینیٹ گچین کاری ءَ ووٹ ءِ بھا زورگ ءِ بیان ءِ پد ءَ نوٹس زورگ لوٹ ایت، راجی ادارگ ءَ سیاسی مردم آنی گچین کنگ ءَ چہ ستیا ناس بوتگ، ملازم تُرئی کجام نمونگ ءَ بھرتی بوتگ اَنت حکومت ایشاناں نہ کش ھگا اِنت، ادارگ وام ءِ سر ءَ نہ چل اَنت، ایشانی تہ ءَ مٹ ءُُ بدلی ’’اصلاحات‘‘ المی اِنت
اسلام آباد ۔ 28 ستمبر (اے پی پی) بُنجاھی وزیر ءِ اھوالکاری ءُُ شنگ کاری چوہدری فواد حسین ءَ گوشت کہ پی ٹی آئی حکومت ءَ اِچ کس ءِ سر ءَ کیس جوڑ نہ کتگ، حکومت پیسر ءَ چہ استیں کیس آنی سر ءَ کار کنگ ءَ انت، ما تو ایوک ءَ ڈاکو آناں سزا دیگ ءِ گپ ءَ کن آں، الیکشن کمیشن ءَ سندھ اسمبلی ءَ تیمور تالپور ءِ بیان ءِ نوٹس زورگ لوٹ ایت ایشی ءِ تہ ءَ سینیٹ گچین کاری ءَ ووٹ بھا زورت ءِ جرم ءَ را منگ بوتگ، راجی ادارگ آنی تہ ءَ سیاسی بھرتی آں ستیا ناس کتگ بلے مُزدگر آناں کجام ھم نمونگ ءَ بھرتی کنگ بوتگ آواناں کشگ نہ بیت، ادارگ آنی تہ ءَ مٹ ءُُ بدلی ’’ اصلاحات‘‘ المی اِنت، ایش وام ءِ سر ءَ نہ چل اَنت۔ آدینگ ءِ روچ ءَ پارلیمنٹ گس ءِ ڈن ءَ اھوالکاراں گوں تران کنان ءَ بُنجاھی وزیر ءَ گوشت کہ پیسریگیں چیف جسٹس افتخار چوہدری سک باز کینگ ءُُ زِد اِنت بلے ایڈن ہاؤسنگ سوسائٹی ءِ کیس ما جم نہ کتگ، اے کیس نیب ءَ پیسر ءَ چہ چلئگ ءَ اِنت، نیب ءَ ایڈن ءِ مالک ءَ ھوار ایندگر دست مانجنیں مردم آنی ھلاپ ءَ ریڈ وارنٹ جاڑی کتگ اَنت ھما آں کہ 12ارب کلدار واتگ بوتگ۔ من ءَ سمجھ ءَ نہ ایت کہ وھد ءِ ایوان ءَ دُز ءُُ ڈُنگ آنی ھلاپ ءَ ایوان ءَ گپ ءُُ تران بیت گڈا اپوزیشن کوکار کنت ءُُ ڈن ءَ واک آؤٹ کنت۔ آ پھم ایت کہ آوانی نیمگ ءَ یک اشارہ اِت کہ پاکستان ءِ آمید گس ءَ کار کنگی اِنت۔ چوہدری فواد حسین ءَ گوشت کہ ریڈیو پاکستان ءِ ھمک سال 4ارب کلدار دیگ بوھگ ءَ اِنت وھدیکہ پی ٹی وی ءَ را ھمک سال 7ارب کلدار دیگ بوھگ ءَ اِنت، راجی ادارگ ائیر لائن (پی آئی اے)، راجی ھال رسانکی ادارگ (اے پی پی) ءَ ھوار دُرست ’’خسارہ‘‘ ءِ تہ ءَ اَنت۔ اگاں من ھمے ادارگ آنی توکی ءَ وتی حلقہ ’’جہلم‘‘ ءَ چہ ہزار مردم بھرتی بکن آں گڈا الیکشن ءَ باج بر آں۔ بُنجاھی وزیر ءَ گوشت کہ ادارگ الس ءِ ٹیکس آنی زرّ ءِ سر ءَ چہ چلائینگ بوھگ ءَ اَنت۔ ادارگ آنی تہ ءَ مٹ ءُُ بدلی میار آں گڈا ما دیم ءَ جنز اِت نہ کن آں۔ اے ادارگ آنی تہ ءَ سیاسی بھرتی آنی کنگ ءَ چہ ستیا ناس بوتگ۔ بلے ما اِچ ملازم ءَ را نہ کش آں آ تُری کجام نمونگ ءَ نوکری ءَ لگ اِتگ۔ چوہدری فواد حسین ءَ گوشت کہ ریلوے ءَ خواجہ سعد رفیق ءَ بے کساس مردم آناں بھرتی کتگ، آ کار کنگ ءَ نیا اَنت بلکینگ ءَ پگار ءِ دزگرگ ءَ کاینت۔ بُنجاھی وزیر ءَ گوشت کہ ریکوڈک ءِ تہ ءَ دست مانجنیں دُرستیں مردم ءُُ سیاسی گل آنی سر ءَ یکجاھیں کیس ءِ درج کنگ لوٹ ایت۔ آئی ءَ گوشت کہ الس آناں پاکستان تحریک ءِ انصاف ءَ چہ امیت اِنت کہ ایلیٹ کلاس ءِ مردم آنی گردن آناں پنجگ ءَ کنگ بیت۔ ما کرپشن ءِ ھلاپ آں بلے ھرکس ءَ گرگ ءِ کوشست ءَ کناں گڈا آ گوشیت کہ سک باز ظلم بوتگ۔ جہانگیر ترین ءِ ’’نااہلی‘‘ ءِ پیسلہ ءِ بابت ءَ جُست ءِ پسو ءَ بُنجاھی وزیر ءَ گوشت کہ سپریم کورٹ ءِ پیسلہ ءِ ھلاپ ءَ مٹ ءُُ بدلی آرگ نہ بیت ءُُ نا کہ جہانگیر ترین ءِ پیسلہ ءِ ھوالگ ءَ مٹ ءُُ بدلی آرگ بیت۔
