راولپنڈی۔ 27 ستمبر (اے پی پی) پاک فوج انا سروک جنرل قمر جاوید باجوہ پارینے کہ سلہہ بند فوج و قوم ملک اٹی امن نا بحالی کن بھلو قربانی تسنو، تینا بقاء کن پین تیار سلنگ و درست سمت اٹی مون آ ہنوئی مریک، مشکل وخت تدینگا، بروک آ مرحلہ امن نا پورو بحالی نا ءِ۔ او ایئر یونیورسٹی ٹی سیکورٹی نا سرحال آ سیمینار آن تران کریکہ۔ پاک فوج انا شعبہ تعلقات عامہ (آئی ایس پی آر) نا رداٹ جنرل قمر جاوید باجوہ دود اٹی قومی سلامتی ، داخلی و خارجی حالیت آتے سرجمی اٹ مون آ تخا۔ پاک فوج انا سروک جنرل قمر جاوید باجوہ دہشت گردی ءِ قوم انا مخ تفی اٹ پورو وڑاٹ چٹفنگ نا عزم انا درشانی ءِ کرسا واضح ءِ کہ خلیس آتون مون تننگ کن غٹ ریاستی ادارہ غاتا قومی کہول آ ہم آہنگی المی ءِ۔ اوپارے کہ ملک اٹی سوگوی کن پاکستانی فوج و قوم بھلو قربانی تسنو۔ اوداعزم انا درشانی ءِ کرے کہ پرامن چاگڑد و معاشی و راجی و شونداری کن فوج ءِ انتس کہ کروئی مس کیک۔ اوپارے کہ پاک فوج اقتصادی شونداری کن ملک اٹی رکھوک چاگڑداس فراوان کیک و گچین سیکورٹی چاگڑد کن تینا کڑد ءِ ادا کرساکیک، قوم انا پبی مخ تفی آن دہشت گردی ءِ جوان وڑاٹ توننگا۔ ملک ءِ مون تروک خلیس آتے کن ہروخت تیار مروئی مریک۔ داکان مست پاک فوج انا سروک جنرل قمر جاوید باجوہ ایئر یونیورسٹی آ سرمس تو پاک فضائیہ نا سروک ایئر چیف مارشل مجاہد انور خان و وائس چانسلر ایئر یونیورسٹی وائس ایئر مارشل (ر) فیض عامر اودے بخیر کریر ۔
