اسلام آباد۔ 27 ستمبر (اے پی پی) بنجائی وزیر اطلاعات و نشریات چوہدری فواد حسین پارینے کہ احوال آتسکان رسینگ و شفافیت ءِ المی جوڑ کننگ کن بنجا و پنجاب اٹی انفارمیشن کمیشن پورو بروک آ منہ دے تیٹی کننگک، انفارمیشن کمیشن نا ٹہیفنگ تون اوار ہی آر ٹی آئی کانود آ عملدرآمد پین ترند و گچین مریک ، مسکوہی حکومت جہانی کہول آ معاہدہ و ٹھیکہ غاتے الس آن ڈکھوک تخا، اوٹی یقیناًشفافیت ہلوکہ ہنداخاطرآن مسکوہی حکومت آک دُن کریر، ہراتم کہ جاست وپاست نا ہیت مسکہ تو اوڑتون اوار ہی ریکارڈ ءِ خاخر لگاکہ، جمہوریت اٹی احوال آتسکان رسینگ کانود اسہ تمبہ سے نا حیثیت تخک، حکومت خوداحتسابی آ یخین تخک شفافیت اٹ حکومتی معاملہ غاک پین شفاف مریرہ ، کے پی کے آن پد بنجاٹی ہم وسل بلورایکٹ اتنگ انگ ءِ ہرانا رداٹ کرپشن یا بدعنوانی ، پلوک آ قومی دولت نا پیدواری ءِ کروک آءِ 20 درسد تننگک و اونا پن ءِ ہم راز اٹ تخنگک۔ او پنچ شنبے نادے وزارت اطلاعات و نشریات و سسٹین ایبل سوشل ڈویلپمنٹ آرگنائزیشن (ایس ایس ڈی او) نا اواری اٹ آرٹی آئی نا جہانی دے انا مناسبت آن پی ٹی آئی حکومت نا شفافیت و احوال آتسکان رسینگ نا وژن نا سرحال آ اڈ ہلوک آ سیمینار آن تران کریکہ۔ ایس ایس ڈی او نا سید کوثر عباس، ایگزیکٹو ڈائریکٹر مریم آن بیدس بشخ ہلوک آک بھلو کچ اسے ٹی دوداٹی ساڑی ئسر۔ بنجائی وزیر اطلاعات و نشریات چوہدری فواد حسین پارے کہ جمہوریت اٹی آرٹی آئی اسہ پلر و سنگ میل نا حیثیت تخک ، الس ءِ بایدے کل گڑاک معلوم مریر و الس ءِ ہر السی مفاد نا معاملہ اسکان پورو رسینگ بایدے مرے۔ احوال آتسکان رسینگ اسہ اہم ءُ کانود سازی اسے ، پاکستان تحریک انصاف نا حکومت خیبر پختونخوا ٹی آرٹی آئی نا بابت غٹ آن مست کانود سازی کریسس و غٹ آن مست انفارمیشن کمیشن کے پی کے ٹی ہم پورو مس و آر ٹی آئی آ عملدرآمد کن فعال کڑد ادا کننگ ءِ۔
