اسلام آباد۔ 27 ستمبر (اے پی پی) صدر مملکت ڈاکٹر عارف علوی پارینے کہ پاکستان و کویت نا نیام اٹ دیرینہ برادرانہ تعلقداریک ءُ ، ہڑتوم آ ملک آتا اسیجا وزارتی کمیشن نا دیوان تیٹی واپاری، اقتصادی و زرکاری تعلقداریک پین سوگو مریرہ۔ او کویت نا وزیر واپار و صنعت خالد نصر عبداللہ تون ہیت وگپ کریکہ ہراپنچ شنبے نادے داڑے ایوان صدر اٹ اوڑتون اوڑدہی کرے۔ ایوان صدر نا کنڈآن جاری بیان نا رداٹ کویت نا وزیر واپار صدر مملکت ءِ امیر کویت شیخ صباح الاحمد الجابر نا کنڈآن مبارکبادی نا کلہو ءِ سرکرے۔ صدر مملکت کویت نا شونداری و شونہالی ٹی پاکستانی برادری نا کڑد آ است جمی نا درشانی ءِ کرے و پارے کہ پاکستان تینا کسب کار افرادی واک اتون کویت نا آخبت نا انسانی وسیلہ غاتا گرج آتے پورو کننگ کیک۔ داوخت آ کویت نا وزیر واپار صدر مملکت نا منت واری ءِ ہرفے و کویت نا کنڈآن پاکستان تون تینا ہڑتوم آ کنڈآتا تعلقداری تا اہمیت ءِ تالان کرے۔ اوہڑتوم آ ملک آتا نیام اٹ تاریخی تعلقداری تے اقتصادی شریداری ٹی بدل کننگ نا اہمیت آ زور شاغا و پارے کہ اسیجا وزارتی کمیشن اٹی ہڑتوم آ کنڈآتا اقتصادی تعلقداری تے مون آ دننگ نا بابت فیصلہ نا پیروی ءِ کننگ نا گرج ءِ۔ اوڑدہی ٹی دا ہیت آ امنا کننگا کہ پاکستان و کویت مسلم دنیا نا اہم ملک ءُ و اسیجا مسخت آتے کن ہر کہول آ اواری اٹ کاریم ءِ برجاتخرہ۔
ٓ
