وزیر خارجہ شاہ محمود قریشی نا یورپی یونین نا نمائندہ خارجہ امور فیڈریکا موگیرینی تون اوڑدہی

اقوام متحدہ۔ 27 ستمبر (اے پی پی) اقوام متحدہ نا جنرل اسمبلی نا 73می دیوان اٹی بنجائی وزیر خارجہ شاہ محمود قریشی و یورپی یونین نا نمائندہ خارجہ امور و سیکورٹی پالیسی فیڈریکا موگیرینی نا نیام اٹ اوڑدہی مس ہراٹی پاکستان و یورپی یونین نا نیام اٹ کمکاری ءِ سوگو جوڑ کننگ تون اوار چندی معاملہ غاتیا خیال آتا درشانی ءِ کننگا۔ ہڑتوم آ راہشونک و یورپی یونین نا نیام اٹ واپار نا بابت جی ایس ڈی پلس اسٹیٹس نا مثبت اثر آتیا ہیت وگپ کریر۔ سرکاری ذرائع آن جاری بیان نا رداٹ پاکستا ن ءِ جی ایس پی پلس نا درجہ 2013 ء ٹی رسینگا ہرانا رداٹ یورپی یونین ءِ برآمد آتے ٹی پاکستا ن ءِ ڈیوٹی فری آسراتی دوبسوسس۔ ہڑتوم آ راہشونک واپار، زرکاری، امن ، سلامتی و شونداری نا بشخ آتے ٹی ہڑتوم آ کنڈآتا کمکاری ءِ سوگو جوڑ کننگ آ امنا کریر۔ وزیر خارجہ شاہ محمود قریشی دا عزم انا اعادہ کرے کہ اوغانستان اٹی پائیدار امن نا اسٹ انگا کسر ہندی سرکڑدہ غاتے ٹی امن عمل ءِ و اوغانستان اٹی امن و سوگوی پاکستان تون اوار مچ آ ڈیہہ و غٹ انا گچین فائدہ ٹی ءِ۔ وزیر خارجہ داوخت آ فیڈریکا موگیرینی ءِ پاک ای یوسٹریٹجک ڈائیلاگ اٹی شرکت کن نومبر اٹی پاکستان نا دورہ ءِ کننگ نا سلہ ہم خلک۔