اقوام متحدہ۔ 27 ستمبر (اے پی پی) وزیر خارجہ شاہ محمود قریشی تینا برطانوی ہم منصب جیرمی ہنٹ تون داڑے اوڑدہی کرے۔ ہڑتوم آ وزیر خارجہ غاتا نیام اٹ مروک آ اوڑدہی ٹی واپار ، زرکاری ، تعلیم و شونداری تون اوار چندی معاملہ غاتیا کمکاری ءِ مون آ دننگ آ خیال آتا درشانی ءِ کننگا۔ ہڑتوم آ راہشون تا نیام اٹ دا اوڑدہی نیویارک اٹی اقوام متحدہ نا جنرل اسمبلی نا 73می دیوان اٹی مس۔ برطانوی وزیر خارجہ جیرمی ہنٹ شاہ محمود قریشی ءِ پاکستان نا وزیر خارجہ نا حیثیت اٹ تقرری آ مبارکبادی تس۔ وزیر خارجہ برطانوی ہم منصب ءِ اوغانستان تون پاکستان نا تعلقداری و مقبوضہ کشمیر اٹی بھارتی فوج انا دوتے ٹی انسانی حق انا سنگین پامالی تیان معلومدار کرے۔ وزیر خارجہ پارے کہ اوغانستان اٹی امن و سوگوی اسہ اسیجا ءُ زمواری اسے و پاکستان تین پہ تینی است خواہی نا غٹ معاملہ غاتے ایسر کننگ کن تین پہ تینی رابطہ غاتا ہڑتوم آ کنڈآتا وڑوڈول نا رداٹ اوغانستان۔پاکستان ایکشن پلان امن و سوگوی کن جوڑ کروک پنچ ورکنگ گروپ آتا مخ تفی ءِ برجاتخک۔ جیرمی ہنٹ اوڑدہی ٹی وزیر خارجہ شاہ محمود قریشی ءِ برطانیہ نا دورہ نا ہم سلہ خلک۔
