لاہور کراچی موٹروے آ شرقپور ، گوجرہ و ٹوبہ ٹیک سنگھ سیکشن پورو ءِ
اسلام آباد۔ 27 ستمبر(اے پی پی) وزیر مملکت پارلیمانی امور علی محمد خان قومی اسمبلی ءِ پارینے کہ لاہور کراچی موٹروے آ شرقپور، گوجرہ و ٹوبہ ٹیک سنگھ سیشن پورو ءُ ، موٹروے پولیس نا تعیناتی آن پد اودے الس کن ملنگک۔ پنچ شنبے نا دے قومی اسمبلی ٹی وقفہ سوج آتے ٹی ریاض فتیانہ نا لاہور کراچی موٹروے شرقپور و گوجرہ ٹوبہ ٹیک سنگھ موٹروے ایم فور سیکشن آتے الس کن ملنگ نا بابت سوج آتا ورندی ٹی وزارت مواصلات نا کنڈآن پاننگاکہ دا الس کن ملنگ کن تیار ءِ ولے مسافر آتا رکھ و ٹریفک ءِ منضبط کننگ کن دابشخ آ موٹروے پولیس تعینات کننگ نا بست و بند کننگ انگ ءِ۔ ریاض فتیانہ نا ضمنی سوج انا ورندی ٹی وزیر مملکت پارلیمانی امور علی محمد خان پارے کہ 31 کلومیٹر شرقپور و گوجرہ ٹوبہ ٹیک سنگھ ہڑتوم آ سیکشن آک تیار ءُ ۔ پولیس نا تعیناتی نا عمل برجاءِ۔ موٹروے پولیس آن سرجم دوئی کننگ آن پد دا دے ملنگ انگک۔ ایوان ءِ گڈیکو تاریخ آن معلومدار کننگک۔ رانا تنویر حسین پارے کہ 31مئی آ دا سیکشن پورو ئس۔ لاہور نا خڑک ٹول پلازہ آ گدرینگوک آ چار تُوآن سست روی اٹ کاریم برجاءِ۔ اگہ کاریم کننگے تو دا اسہ ہفتہ سے نا کاریم ءِ۔ وزیر مملکت علی محمد خان پارے کہ غٹ کاریم پورو مسنے۔ ہندن کہ موٹروے پولیس ءِ خلنگک دادے ملنگک۔ نواب محمد یوسف تالپور نا کراچی حیدر آباد موٹروے آ اِراٹول پلازہ آتا ساڑی مننگ نا بابت سوج انا ورندی ٹی وزیر مملکت پارے کہ واقعی اِراٹول پلاز ہ نا ہچ ءُ سوب اس اف۔ شیخ فیاض الدین نا ریمارکس نا ورندی ٹی وزیر مملکت علی محمد خان پارے کہ وزارت ملانے ننے داسکان اسہ تو اس مسنے نن ہم خوانہ وزارت آتا نابودی تا سرجم آک ننے ملر۔ نن تینٹ نابودی نا فہرست آتے مرتب کننگ خوانہ کہ گدرینگوک آ پنچ سال اٹی وزارت آتا کارکڑد انت مسنے ۔
