اسلام آباد۔ 27 ستمبر (اے پی پی) بنجائی وزیر قومی جان جوڑی ، سروسز عامر محمود کیانی نا کماشی ٹی دوائی تا برآمد کروک آتا دیوان اس اڈ ہلک۔ دیوان اٹی دوائی سازی نا کچ و متبادل دوائی تا برآمد آتے ٹی ودکی نا میکنزم نا بارواٹ خیال آتا درشانی ءِ کننگا۔ ڈرگ ریگولیٹری اتھارٹی آف پاکستان (ڈریپ) نا چیف ایگزیکٹو آفیسر (سی ای او) ڈاکٹر شیخ اختر حسین بنجائی وزیر ءِ پارے کہ ڈریپ دا ہندی دوائی ساز ادارہ غاتے آسراتی تا فراوانی نا گام گیج کرینے ہراکہ ایلو ملک آتے دوائی برآمد کننگ ءِ۔ دا گام گیج و آسراتی تیٹی ترندی اٹ رجسٹریشن اسہ سال اٹی اسہ لکھ ڈالرز نا برآمد کروک آتا رجسٹریشن اٹی رعایت و برآمد آتا غرض اٹ ریگولیٹری دستاویز آتا جاری کننگ اوار ءِ۔ بنجائی وزیر دیوان اٹی دوائی ساز صنعت نا کنڈآن گڑاس گڑتی تا ورندی ٹی داہیت آ زور شاغاکہ اوفتا ویل و مشکل آتا دادرسی کن ٹڈ اپ و کسٹمز تون ہیت کننگک و دوائی تا برآمد کنندگان آتون اسہ وڑ و بریبری سلوک کننگ نا گرج ءِ۔ اوپارے کہ پاکستان نا دوائی ساز ادارہ غاتے ٹی بھلو لائخی اس ارے و ملک ءِ اوفتا بھرم آتیان فائدہ ہرفنگ نا گرج ءِ ہراڑکن دوائی و متبادل دوائی تا برآمد آتے ٹی گچینی اتسا زرمبادلہ کٹیا کننگے۔ دیوان اٹی پاننگاکہ فارما نا برآمد آتا بشخ داوخت 230 ملین ڈالرز کٹیا کننگ ءِ و داٹی 2ارب ڈالر اسکان کٹیا کننگ نا لائخی ءِ۔دیوان اٹی ڈریپ نا چیف ایگزیکٹو آفیسر دوائی تا برآمد کنندگان آتے پین آسراتی تا فراوانی نا باوری ترفے۔ اوپارے کہ ہندی دوائی ساز ادارہ غاتے آسراتی نا فراوانی کن گام گیج کرینن ہراکہ ایلو ملک آتے دوائی برآمد کننگ ءُ۔ ڈریپ معیاری دوائی تے گچین و رکھ جوڑ کننگ ءِ المی جوڑ کننگ خواہک و کانود نا دنگ اٹی سلسا صنعت ءِ آسراتی تا فراوانی کن ہر وڑکوشست کننگک۔
