اسلام آباد۔ 27 ستمبر (اے پی پی) بنجائی وزیر ڈٹ بندی، شونداری و اصلاحات مخدوم خسرو بختیار پارینے کہ سی پیک نا رداٹ پن بجلی ڈٹ آتے شون تننگ حکومت نا اولیت آتے ٹی اوار ءِ ہرانا سوب ملک اٹی توانائی نا ودوک آ گرج آتے پورو کننگ و ہڑزآن بجلی دوئی کننگ اٹ کمک رسینگک۔ داخیال آتا درشانی ءِ او تینا دفتر اٹی چین نا گازوباکارپوریشن نا اسہ ڈل اسے تون اوڑدہی کرے۔ چینی کمپنی نا ڈل انا سرکڑدہ ہی مارکیٹنگ صدر سویلی ایشیا وانگ بو کریکہ۔ بنجائی وزیر مخدوم خسرو بختیار پارے کہ معاشی شونداری تون پاکستان اٹی توانائی نا گرج آتے ٹی ودکی مننگ ءِ ، داودکی ءِ مون آ تخسا حکومت پن بجلی ڈٹ آتا جوڑ جاڑ آ پبی چکار کننگ ءِ۔ دارداٹ سی پیک نا بجلی ڈٹ آتا فہرست اٹی آزاد پتن و محل ہائیڈرو پراجیکٹ آتا اوار مننگ نا سلاہ تننگانے۔ اوپارے کہ وزیراعظم عمران خان نا راہشونی ٹی حکومت داسو ہائیڈرو پروجیکٹ آ کاریم نا رفتار ترند کننگ آ چکار کننگ ءِ انتئے کہ دا میگا ڈٹ انا سوب دیر ءِ کوڑی کننگ و بجلی ودی کننگ نا بھلو وارخواہی اس دستیاب مریک۔
