اسلام آباد۔ 26ستمبر (اے پی پی) بنجائی وزیر اطلاعات و نشریات چوہدری فواد حسین پارینے کہ ایڈن ہاؤسنگ سوسائٹی کیس اٹی بھلو بریک تھرو اس مسنے و مسکوہی چیف جسٹس افتخار چوہدری نا سالم ءِ دبئی ٹی دزگیر کننگانے، سکینڈل اٹی افتخار چوہدری نا مار، مسڑ و سمدھی نا ہم پن ارے، مسکوہی چیف جسٹس افتخار چوہدری نا سالم مرتضیٰ امجد ایڈن ہاؤسنگ سوسائٹی نا مالک ءِ ہرا دبئی آ نراسس، اونا دزگیری کن وارنٹ نیب جاری کریسس، وزیراعظم عمران خان کیس انا بابت 24گھنٹہ ٹی رپورٹ ءِ بٹنگانے۔ چارشنبے نادے پارلیمنٹ ہاؤس نا پیشن میڈیا تون ہیت وگپ کرسا بنجائی وزیر اطلاعات و نشریات چوہدری فواد حسین پارے کہ داسہ پاکستان نا تہٹی واکدار نا ہم احتساب شروع مسنے، وزیراعظم نا لاہور نا دورہ نا وخت آ ایڈن ہاؤسنگ سوسائٹی نا زہمی بندغ آک وزیراعظم ہاؤس نا پیشن برانز کریسر۔ مستین اٹی ایڈن ہاؤسنگ نا پن اٹ اسکیم اٹی پلاٹ آتا بہاء کننگ اٹی بھلو فراڈ اس مسوسس، سد آ بندغ آک دا اسکیم اٹی تینا جمع پونجی ءِ خڑچ کرسا پلاٹ ہلکر ولے فراڈ نا سوب اوفتا پیسہ غاک ہناسر۔ ایڈن سوسائٹی نا مالک ہمووخت انا چیف جسٹس آف پاکستان افتخار چوہدری نا سالم ئس ۔ حیرانی وڑاٹ افتخار چوہدری تینٹ داکیس ءِ بِنگ و اسہ کنڈی فیصلہ اس کرسا ایڈن سوسائٹی نا مالک ءِ ریلیف تس۔ وزیر اطلاعات پارے کہ داسہ ایڈن ہاؤسنگ سوسائٹی کیس اٹی بھلو پیش رفت اس مسنے و ایف آئی اے افتخار چوہدری نا سالم مرتضیٰ امجد ءِ دبئی آن دزگیر کرینے ہرا داکیس اٹی درکار ئس ۔ فواد چوہدری پارے کہ ایڈن سوسائٹی کیس اٹی درکار ایلو دوبہ دار مسکوہی چیف جسٹس افتخار چوہدری نا مار ارسلان افتخار، مسڑ و سمدھی ءِ زوت دزگیر کننگک۔ اوپارے کہ وزیراعظم عمران خان کیس انا بابت 24گھنٹہ ٹی رپورٹ ءِ بٹنگانے۔
