اقوام متحدہ۔ 26 ستمبر (اے پی پی) پاکستان جھیڑہ غاتا گواچی ڈیہہ تیٹی بدلینگوک و ودوک آ بے ڈھب خلیس آتون مون تننگ کن اقوام متحدہ نا امن مشن نا مینڈیٹ ءِ المی جوڑ کننگ و اودے درکار وسیلہ فراوان کننگ آ زور شاغانے۔ وزیر خارجہ شاہ محمود قریشی اقوام متحدہ نا جنرل اسمبلی نا 73می دیوان نا وخت آ یو این پیس کیپنگ آپریشن نا بابت اسہ دیوان اسے ٹی پارے کہ اقوام متحدہ نا امن مشن نا سرسہبی دا مشن اٹی اوار نرینہ و نیاڑی کارندہ غاتا قربانی تا نتیجہ ءِ، نن امن کن جان تے ندر کروک آ کارندہ غاتے خراج عقیدت پیش کینہ۔ وزیر خارجہ پارے کہ پاکستان اقوام متحدہ نا امن مشن کن افرادی واک تروک آ اسہ بھلو ملک اسے و دا دنیا نا 46ملک آتے ٹی تعینات امن مشن آتے کن گدرینگوک آ 6عشرہ ٹی 2لکھ سیکورٹی کارندہ تسنے، ہرافتیان 156 بہادر آک امن کن تینا جان تے ندر کریر۔
