اسلام آباد۔ 26ستمبر (اے پی پی) وزیر مملکت داخلہ شہریار خان آفریدی قومی اسمبلی ءِ پارینے کہ بنجائی دارالحکومت اسلام آباد نا غٹ شاری و خلقی آ علاقہ غاتے ٹی ڈینگی وائرس ءِ چٹفنگ کن گچین گام گیج چست کننگ انگ ءِ، حکومت داویل ءِ ایسر کننگ کن ڈبلیو ایچ او تون اوار غٹ ادارہ و کڑدہ غاتون رابطہ ٹی ءِ۔ گدرینگوک آ سال انا مقابلہ ٹی اینخو نا سال ڈینگی وائرس نا ناجوڑ آتا کچ کم مرسا 35اسکان بسنے، دابابت الس اٹی شعور تالان کننگ تون اوار اوار غٹ گچین گام گیج آتے چست کننگک۔ چارشنبے نادے قومی اسمبلی ٹی نفیسہ عنایت اللہ خٹک نا بنجائی دارالحکومت نا اِراہسپتال اٹی ڈینگی وائرس نا مثبت نشان تا بابت چکاری نوٹس آ وزیر مملکت داخلہ شہریار خان آفریدی پارے کہ ڈینگی کودک انسان تا جان ءِ ہلکونے۔ پنجاب ، کے پی کے تون اوار غٹ صوبہ و بنجانا کہول آ گام گیج چست کننگانے۔ ستمبر اٹی دامرض انا غاو تا بنامریک و دامرض نومبر اٹی چٹنگ نا بناءِ کیک۔ اسلام آباد اٹی گدرینگوک آ سال انا مقابلہ ٹی اینخو نا سال ڈینگی نا غاوک کم مرسا 35مسنو۔ دابابت وزارت جان جوڑی خصوصی گام گیج چست کرینے ، ای تینٹ لیبارٹری نا دورہ ءِ کرینٹ۔
