اسلام آباد۔ 25 ستمبر (اے پی پی) اسپیکر قومی اسمبلی اسد قیصر وزیر پارلیمانی امور ءِ تعلقدار وزارت آتا آفیسر آتا دیوان اٹی ساڑی مننگ ءِ المی جوڑ کننگ نا پارت کرینے۔ سے شنبے نادے قومی اسمبلی نا دیوان اٹی سردار ایاز صادق اعتراضی ٹک آ پارے کہ او اسپیکر نا کرسی آ تولسا سیکرٹریز و وزیر آتا ساڑی مفننگ نا برخلاف بائیکاٹ کریسس۔ اواسپیکر آن خواست کرے کہ او وزیر و جتا وزارت آتا آفیسر آتا ساڑی گری ءِ المی جوڑ کے ہراڑآ اسپیکر وزیر پارلیمانی امور ءِ جائنٹ سیکرٹری کہول انا آفیسر نا ساڑی گری ءِ المی جوڑ کننگ نا پارت کرے۔ رانا تنویر پارے کہ رولز انا رداٹ وزارت آتیان تعلقدار سوج آتیا تعلقدار وزارت نا سیکرٹریک بایدے ایوان اٹ ساڑی مریر ہراڑآ وزیر پارلیمانی امور علی محمد خان پارے کہ او باوری ترفک کہ دا معاملہ غا ننا اختلاف رائے اف۔اوپارے کہ اسد عمر نیکٹا نا دیوان اٹی ساڑی ءِ و 20 منٹ اسکان سیکرٹری یا ڈپٹی سیکرٹری کہول انا آفیسر اس بریک۔ سید خورشید شاہ پارے کہ ضمنی مالیاتی بل آ شرہ ٹی وزیر خزانہ بایدے دیوان اٹی ساڑی مروسس، نن غٹ پارلیمان نا بالادستی ءِ المی جوڑ کننگ کن بایدے کاریم کین، ای کوشست کریسٹ کہ بطور لیڈر آف اپوزیشن ایوان اٹ ساڑی مریو۔ ہراڑآ وزیرپارلیمانی امور علی محمد خان پارے کہ داوخت پنچ وزیر ایوان اٹی ساڑی ءُ ۔ حماد اظہر فنانس نا وزیر مملکت ءِ او نوٹس ہلنگ ءِ۔ داوخت سیکرٹری خزانہ اسد عمر تون اوار اسہ دیوان اسے ٹی ءِ وخت اس کہ جائنٹ سیکرٹری ایوان اٹی نوٹس ہلنگ ءِ۔
