اسلام آباد۔ 25ستمبر (اے پی پی) پیپلزپارٹی نا باسک قومی اسمبلی سید نوید قمر پارینے کہ داوخت اسکان انتس کہ گام گیج مسنے داڑآن کبینی ٹی ودکی مریک، نمائشی گام گیج آتا جاگہ غا عملی گام گیج کننگے۔ سے شنبے نادے قومی اسمبلی ٹی سید نوید قمر ضمنی مالیاتی بل آ شرہ ٹی بشخ ہلسا پارے کہ اسہ پلو نن معیشت ءِ دستاویز جوڑ کننگ نا ہیت ءِ کینہ و ہردے دانا بارواٹ بیان ہم بریک کاہک ولے پالیسی پارت آک دا بیان تا برعکس ءُ۔ فائلرز و نان فائلرز آتا نیام اٹ پرخ ءِ چٹفسا حکومت ہڑتوم آتے بریبر گوندانے، داجاگہ غا حکومت بانڈز جاری کننگ کریکہ۔ اوپارے کہ لس بندغ ءِ ریلیف تننگ نا پن آ گیس و بجلی نا نہاد آتے ٹی ودکی کننگا۔ یخ آک بننگ ءُ و گیس انا کاریم اٹ اتنگ اٹی ودکی آن لس صارف نا تواٹی بل آ پین بھاریم تمک۔ اوپارے کہ کبینی و افراط زر خراج نا بدترانگا دروشم ءِ و داوخت اسکان انتس کہ گام گیج مسنے داڑآن کبینی ٹی ودکی مریک۔ سید نوید قمر پارے کہ درآمد و برآمد آتے ٹی نمان پرخ آن ہم لس بندغ زہمی مننگ ءِ ، اگہ آئی ایم ایف نا کنڈآ ہنوئی ءِ تو قوم ءِ پت اٹ ہلنگے۔ اوپارے کہ لیڈر آف اپوزیشن نا کنڈآ میثاق معیشت نا پیشکش نا حکومت سنجیدگی اٹ بایدے ورندی ءِ ایتے۔
