وزیراعظم عمران خان نانیشنل کاؤنٹر ٹیررازم اتھارٹی (نیکٹا) نابورڈ آف گورنرز نا اولیکو دیوان اٹی خیال آتا درشان
دیوان ءِ دہشت گردی و پرتشدد انتہاپسندی ناانسدادکن پالیسی سازی و قومی حکمت عملی آعملدرآمد کن نیکٹا نا مینڈیٹ و کڑد انا بارواٹ احوال تننگا
اسلام آباد ۔ 25 ستمبر (اے پی پی) وزیر اعظم عمران خان پارینے کہ نیشنل کاؤنٹر ٹیررازم اتھارٹی (نیکٹا) ءِ اسہ کاریمی و پوسکن ءُ ادارہ اس جوڑ کننگ کن پوسکن آ ڈغاری حق اونا کڑد انا اول سرآن جاچ انا متقاضی ءِ وخت اس کہ نیکٹا نا کڑد و معاملہ غاتا جاچ ءِ ہلنگ کن اسہ کمیٹی اس ٹہیفنگ نا فیصلہ کننگانے ہرا اسہ ہفتہ ٹی تینا سلاہ و سوج آتے وزیراعظم ءِ پیش کیک ۔ داہیت انا درشانی ءِ سے شنبے نادے وزیراعظم عمران خان نا کماشی ٹی وزیر اعظم آفس اٹی نیشنل کاؤنٹر ٹیررازم اتھارٹی (نیکٹا) نا بورڈ آف گورنرز نا دیوان اٹی کننگا۔ دا نیکٹا نا جوڑ کننگ آن پد آن اونا بورڈ آف گورنرز نا اولیکو دیوان ئس ا۔ دیوان اٹی وزیر دفاع ، وزیر خزانہ، وزیر کانود، ہر چار آ صوبہ و گلگت بلتستان نا وزیر اعلیٰ ، وزیر اعظم آزاد کشمیر ، وزیر مملکت داخلہ ، ڈی جی آئی ایس آئی، سیکرٹری داخلہ ، نیشنل کوآرڈینیٹر نیکٹا، چیف سیکٹریز، پولیس نا آئی جیز و سینئر کمامدارآک ساڑی ئسر ۔ نیشنل کوآرڈینیٹر نیکٹا دیوان ءِ دہشت گردی و پرتشدد انتہاپسندی نا انسدادکن پالیسی سازی و قومی حکمت عملی آعملدرآمد کن اولی ادارہ نا حیثیت اٹ نیکٹا نا ٹہیفنگ آن پد آن اونا مینڈیٹ و کڑد انا بارواٹ احوال تس۔ دیوان اٹی 20 ٹکی نیشنل ایکشن پلان آعملدرآمد نا حالیت آتا جاچ ءِ ہلنگا ۔داوخت آ وزیراعظم پارے کہ پاکستان پرتشدد انتہا پسندی ناانسداد و دہشت گردی نا لعنت نا برخلاف بھلو جنگ اس کرینے ۔ نن تینا ہزار آ شاری و سکیورٹی کارندہ غاتا جان تا نذرانہ پیش کرینن ۔ سلہہ بند فوج ، انٹیلی جنس ادارہ ، پولیس و ایلو کانود نافذ کروک آ و سیکورٹی ادارہ غاتا کی گراں قدر خذمت آتا ستاءِ کرسا وزیر اعظم عمران خان پارے کہ اینو سکیورٹی نا گچین حالیت آک غٹ کڑدہ غاتا مربوط کوشست آتا نتیجہ ءِ ۔ وزیر اعظم دا ہیت آ است ہسونی نا درشانی ءِ کرسا پارے کہ ادارہ نا ٹہیفنگ آن اونا بورڈ آف گورنرز نا اسہ دیوان اسے ہم بٹنگ انگ تنے، پارے کہ گدرینگوک آ حکومت نا لاپرواہی ٹی اسہ اہم ءُ ادارہ سے نا معاملہ کار ءِ گچین جوڑ کننگ آ چکار نا کمتی ئس ۔ وزیراعظم پارے کہ پوسکن آ ڈغاری حق ادارہ نا کڑد آ نظرثانی نا متقاضی ءِ تانکہ نیکٹا ءِ گچین وڑ اٹ متعین مینڈیٹ اتون حقی وڑاٹ اسہ کاریمی ءُ و پوسکن آ وڑوڈول آتیا ادارہ اس جوڑ کننگ مرے ہنداخاطرآن دیوان اٹی ادارہ نا کڑد و معاملہ کار نا جاچ ءِ ہلنگ کن اسہ کمیٹی اس ٹہیفنگ نا فیصلہ کننگا۔ دا کمیٹی اسہ ہفتہ سے ٹی وزیراعظم ءِ تینا سلاہ و سوج آتے پیش کیک ۔
