اسلام آباد۔ 24ستمبر (اے پی پی) بنجائی وزیر جان جوڑی عامر محمود کیانی پارینے کہ حکومت جان جوڑی نا بشخ اٹی پٹ و پول ءِ اہمیت ایتک، دا بشخ آ ہفتاد سال اٹی چکار کننگتنے، الس ءِ جان جوڑی نا آب اٹ آسراتی تننگ کن دا بشخ انا بجٹ ءِ ودفنگ المی ءِ۔ او دوشنبے نادے پاکستان ہیلتھ ریسرچ کونسل نا کنڈآن اولیکو قومی ہیلتھ ریسرچ کانفرنس آن تران کریکہ ہرانا مہمان خاص صدر مملکت عارف علوی ئس۔ داوخت آ بنجائی وزیر جان جوڑی پارے کہ ساڑی آ حکومت جان جوڑی نا بشخ اٹی پٹ وپول ءِ اہمیت ایتک و دانا مون آ دننگ کن پاکستان ہیلتھ ریسرچ کونسل ءِ پین سوگو کننگ انگ ءِ و داچرجوئی ٹی اسہ خصوصی ءُ فنڈ اس جاری کننگک انتئے کہ جان جوڑی نا بشخ ننا اولیت ءِ و داڑکن غٹ تر وسیلہ غاتے کاریم اٹ اتنگک۔ وزیر جان جوڑی مستی پارے کہ کچ اٹنگا ملکی وسیلہ و بے کچ ویل آتا پیش نظر گرج داہیت انا ءِ کہ ملک اٹی ہندن ءُ پٹ وپو ل اسے مون آ دننگے ہراڑآن جان جوڑی نا بنداوی ویل آک ایسر مریر۔
