واشنگٹن۔ 24ستمبر (اے پی پی) وزیر خارجہ شاہ محمود قریشی پارے کہ پاکستان داہیت آ یخین تخک کہ ڈیہہ ٹی امن و سوگوی ءِ المی جوڑ کننگ کن مذاکرات اسٹ انگا کسر ءِ ، پوسکن آ حکومت ہمو کاریم ءِ کیک ہرا پاکستان نا گچین فائدہ ٹی مریک۔ پاکستان بھارت تون امن خواہک و مثبت سجفک ولے نن صفا کننگ خوانہ کہ نن ہر بیدادی تون مون تننگ نا لائخی تخنہ، اوغانستان اٹی مریس و دیرپا سیاسی ایسری و امن و سوگوی کن اسہ جامع طرزعمل ءِ تینا کننگ ناگرج ءِ۔ وزیر خارجہ داہیت انا درشانی ءِ اقوام متحدہ نا جنرل اسمبلی نا دیوان آن مست کرینے ہراڑے او 29 ستمبر آ تران کیک، اومیت ءِ کہ او تینا تران اٹی ڈیہہ ٹی امن و سوگوی کن پاکستان نا اصولی موقف، اوغانستان اٹی امن و کشمیر نا متکن آ جھیڑہ ءِ تالان کیک۔ واشنگٹن اٹی پاکستانی سفارت خانہ ٹی صحافی تے بریفنگ ترسا او پاکستان و امریکہ نا نیام اٹ جاری ہیت وگپ اٹی تعلقداری تیٹی سرد مہری نا چٹفنگ، بھارت تون تعلقداری و جنگ آن زہمی اوغانستان اٹی امن کن کروک آ کوشست آتا بابت ہیت وگپ کرے۔ وزیر خارجہ شاہ محمود قریشی تینا امریکی ہم منصب مائیک پومپیو تون 2اکتوبر آ اوڑدہی کیک، دااوڑدہی نا سلہ ءِ امریکی سیکرٹری خارجہ تینا ساڑی آ دورہ پاکستان اٹی خلکوسس۔ امریکہ و پاکستان نا نیام اٹ تعلقداری تیٹی ساڑی آ تناؤ نا حوالہ ءِ ترسا وزیر خارجہ پارے کہ ہڑتوم آ ملک آتا نیام اٹ ہڑتوم آ کنڈآتا تعلقداری ساڑی آ دے تیٹی ’’فریکچرڈ‘‘ مسوسس ولے پاکستان امریکہ تون تعامل ءِ مون آ دننگ نا ارادہ ظاہر کرے و اسیجا ٹک آتیا تعلقداری تے مون آ دننگ آ تینا چکار ءِ کرے ۔ پاکستان امریکہ تون تین پہ تینی مفاد و شرف آ مبنی بنداو تیا تعلقداری نا است خواہی تخک۔
