اسلام آباد۔ 19 ستمبر (اے پی پی) سی پیک اِرا حکومت آتا آخابلکن اِرا قوم انا نیام اٹ گچین تعلقداری تا معاہدہ ءِ۔ داہیت ءِ بنجائی وزیر مذہبی امور بین المذاہب ہم آہنگی صاحبزادہ ڈاکٹر نورالحق قادری پاکستان اٹی چین نا سفیر جناب یاؤ جنگ تون تینا دفتر اٹی اوڑدہی ٹی پارے۔ سرجم احوال آتارداٹ اینو چینی سفیر بنجائی وزیر مذہبی امور صاحبزادہ ڈاکٹر نورالحق قادری تون اونا دفتراٹی سی پیک معاہدہ، فاٹا ریجن اٹی راجی شونداری، اوغان مہاجرو ہڑتوم آ ملک آتا نیام اٹ مذہبی ہم آہنگی ٹی کمکاری و مون آ دننگ آ سرجم ہیت وگپ کریر۔ بنجائی وزیر نا پاننگ ئس کہ وزیراعظم پاکستان عمران خان سی پیک نا جوڑ جاڑ و زوت پوروی آ دوٹوک موقف اختیار کرینے۔ پاکستان ہر حال اٹ چین تون تعلقداری ءِ ودفک۔ ننا موقف ءِ ہرا چین نا دشمن ءِ او پاکستان نا دشمن ءِ۔ سی پیک ڈٹ اٹی فاٹا نا علاقہ ءِ خاص اہمیت تننگے۔ فاٹا نا الس ہم چائنا نا کنڈآ ہُننگ ءُ۔ علاقہ نا راجی شونداری نا بابت غٹ آن مست زالبول نا تعلیم، جان جوڑی و صاف دیر انا فراوانی آ اواری اٹ کاریم کیرہ۔ علاقہ ٹی شونداری و گچین رابطہ کن ہر ضلع و تحصیل نا کہول آ خوانوک آ خلقت نا پڑاس مقرر کننگک۔ فاٹا ٹی کاریم آن اوغانستان اٹی امن کن پین کسر آوار مریک۔ اوغانستان تون تعلقداری ٹی بھلو گچینی اس بسنے۔ گچین مذہبی ہم آہنگی کن ہڑتوم آ ملک آتا نیام اٹ عالم دین آتا خیال آتا درشانی المی ءِ۔ چینی سفیر یاؤجنگ نا پاننگ ئس کہ چین اٹی 2کروڑ مسلمان رہینگ انگ ءُ ہرافتے پورو آزادی دوئی ءِ۔ پاکستان اسلامی دنیا نا اہم انگا ملک ءِ ۔ نن پاک چائنہ تعلقداری ءِ اسلامی کہول آ پین استوار کننگ خوانہ و دا تعلقداری تیٹی تینا مسلم کمیوٹی ءِ اوار دننگ خوانہ۔ نن چین اٹی مسلمان تا تعلیمی نصاب آ اواری اٹ کاریم کینہ۔ چین فاٹا ٹی 50 اسکول ملنگ نا ارادہ تخک۔ فاٹا ٹی کاریم کننگ کن وزیر مذہبی امور نا خصوصی کمکار ی نا گرج مریک۔
