اسلام آباد۔ 19 ستمبر (اے پی پی) وزیر مملکت پارلیمانی امور علی محمد خان پارینے کہ گچین کاری تیٹی دھاندلی نا جاست وپاست نا بابت حکومت نا نیت باالکل صفا ءِ ، وزیراعظم پاکستان عمران خان اولیکو دے پاریسس کہ گچین کاری تیٹی دھاندلی نا اپوزیشن نا غاو تے مر کننگ کن نن تیار اُن۔ وزیراعظم نا پڑو آن پد حکومت عملی وڑاٹ اولیکو دیوان اٹی ترمیمی بل اس پیش کرے و جاست وپاست کرفنگ نا بابت کاریم نا بناءِ کرے۔ چارشنبے نادے پارلیمنٹ ہاؤس نا پیشن میڈیا تون ہیت وگپ کرسا اوپارے کہ وزیراعظم دھاندلی نا جاست وپاست نا بابت اولیکو دے پڑو کریسس ہراڑآ عملی وڑاٹ اولیکو دیوان اٹی ترمیمی بل اس پیش کرے۔ وزیرمملکت پارے کہ گچین کاری تیٹی دھاندلی نا جاست وپاست کن پارلیمانی کمیٹی نا جوڑ کننگ کن دھرنہ، جلوس و نئے کس اسے سپریم کورٹ آ ہننگ نا ضرورت تمے۔ حکومت اپوزیشن نا خواست ءِ امنا کرے و کمیٹی ٹی بریبری نا بنداو آ نمائندگی تننگ انگ ءِ۔ دابابت ننا نیت و است صاف ءِ۔ علی محمد خان پارے کہ گچین کاری تیٹی دھاندلی نا جاست وپاست نا بابت پارلیمانی لیڈر آتون بھلو مذاکرات اس مس و طے مس کہ آئین نا رداٹ ہرا سلاہ اک بریرہ اوفتیا عمل کننگک۔ اسہ سوج اسے نا بارواٹ پاک بھارت کرکٹ میچ انا بارواٹ وزیر مملکت اومیت ظاہر کرے کہ قومی کرکٹ ٹیم بھارت تون میچ اٹی ضرور سرسہبی دوئی کیک۔ مچ آ قوم اوفتا سرسہبی کن دعا کننگ ءِ۔
